Salmau 148 - Welsh Metrical Psalms by William Rees 1875

SALM CXLVIII.11au.

1Clodforwch yr Arglwydd,

Dyrchefwch eich llef,

Chwychwi sy’n preswylio ’n

Uchelder y nef;

2Angylion, cerubiaid,

Seraphiaid, a saint —

Cydblethwch ei foliant,

Cyfrifwch hi ’n fraint.

3Chwychwi, haul a lleuad,

Sy ’n teithio uwch ben;

Chwi, sêr y goleuni,

Sy’n britho y nen;

4Chwi, ddyfroedd, sy’n nofio’r

Ffurfafen, rhowch glod,

5I enw IEHOFAH,

’Rhwn roes i chwi fod.

7Clodforwch yr Arglwydd,

O’r ddaear ynghyd;

Y dreigiau, ’r dyfnderau,

Drwy gyrau ’r holl fyd;

8Tân, cenllysg, ac eira,

Rhowch iddo ef barch,

A’r gwyntoedd ystormus

Sy’n gwneuthur ei arch.

9Mynyddoedd, a bryniau,

Y meusydd, a’r coed,

Cydgenwch ogoniant

Yr hwn oedd erioed;

10Bwystfilod, ’nifeiliaid,

Ymlusgiaid y llawr,

Rhowch glod ac anrhydedd,

I enw ’r Duw mawr.

Rhan

II.

11au.

11Brenhinoedd y ddaear,

A’r bobloedd ynghyd;

T’wysogion, penaethiaid,

Holl farnwyr y byd;

12Henafgwyr, a llangciau,

Gwyryfon — pob gwlad

Ac iaith dan y nefoedd,

Rhowch iddo fawrhâd.

13Moliennwch yr Arglwydd,

Efe yw ein Tad;

Ei enw sy’n deilwng

O barch a mawrhâd:

Y mae ardderchawgrwydd

Ei hanfod fawr ef,

Uwch law yr holl ddaear,

Uwch law yr holl nef.

14Efe sy’n dyrchafu

Ei bobl mewn braint;

Efe yw gogoniant.

A mawl ei holl saint —

Ei Israel ddewisol.

Chwychwi sydd yn byw

Yn llewyrch ei wyneb,

Moliennwch eich Duw.

Nodiadau.

Trefna y salmydd gyngherdd (concert) digyffelyb yn y salm hon. Casgla ynghyd holl gôrau angylaidd nef y nef: a holl gôrau y ganol‐nef — haul a lleuad, a’r holl sêr goleuni: a holl gôrau yr isaf‐nef — gwyntoedd, tân, cenllysg, eira: a holl gôrau y ddaear — mynyddoedd, bryniau, meusydd, coed, bwystfilod, ac ymlusgiaid: a holl gôrau a graddau dynoliaeth — brenhinoedd, tywysogion, penaethiaid, barnwyr yr holl bobl, henafgwyr, llangciau, a gwyryfon, i gydymuno i lenwi yr holl fydysawd â moliant Duw. Cyn i bechod a gwrthryfel dori ar gydgord y beroriaeth, yr oedd holl weithredoedd a holl greaduriaid Duw yn ei gydglodfori âg un dôn; ac felly y byddant etto, pan ddêl “amseroedd adferiad pob peth, y rhai a ddywedodd Duw trwy enau ei holl sanctaidd brophwydi erioed.”