Salmau 111 - Welsh Metrical Psalms by William Rees 1875

SALM CXI.8.7.4.

1Moeswch fawl i’r Arglwydd: canaf

Iddo o’m calon glod, mae’n fraint,

Yn nghymmanfa y rhai uniawn,

Yn nghyn’lleidfa fawr ei saint:

2Mawr a rhyfedd,

Yw ei holl weithredoedd ef.

Pawb a’u hoffant sy’n eu ceisio,

3Gogoneddus ŷnt i gyd;

Pery byth heb ddiwedd arno

Ei gyfiawnder ef o hyd.

4Mawr a rhyfedd,

Graslawn a thrugarog yw.

5Rhoddodd ymborth i ddiwallu

Y rhai oll a’i hofnant ef;

Cofia byth ei hen gyfammod,

Wnaeth cyn seilio dae’r a nef.

Ef i’w eiddo

A gyflawna ’n llwyr ei air.

6Mawr gadernid ei weithredoedd,

I ei bobl yn hysbys wnai;

Rhoddodd iddynt etifeddiaeth

Y cenhedloedd i’w mwynhau.

Hwythau drigant

Yno, a moliannant ef.

7Barn, gwirionedd, ac unionder

Yw gweithredoedd ei ddwy law;

A’i orch’mynion oll ynt sicr —

8Byth yr un ni chilia draw.

Mewn gwirionedd

A chyfiawnder hwy sicrheir.

9Anfon wnaeth i’w bobl ymwared;

Seiliodd ei gyfammod rhad,

Yn drag’wyddol; tra ofnadwy —

Sanctaidd yw ei enw mâd.

Sanctaidd,

Sanctaidd, ac ofnadwy yw efe.

10Dechreu cyntaf gwir ddoethineb

Ydyw ofn yr Arglwydd nef,

Deall da sydd gan y rheiny

Gadwant ei orch’mynion ef.

Mae ei foliant

Yn dragwyddol yn parhau.

Nodiadau.

Dafydd, fe dybir, oedd awdwr y salm hon; ac y mae hi, a’r un nesaf, yn ddwy o’r deuddeg caniadau cywrain yr Ysgrythyr sydd yn dechreu pob llinell gyda llythyren o’r egwyddor Hebreig, ac yn dilyn yn rheolaidd felly hyd y diwedd; ond y mae hon a’r salm nesaf, a’r drydedd bennod yn Llyfr Galarnad Ieremiah, yn gaethach na hyny etto — yr un llythyren yn dechreu pob llinell yn mhob pennill. Yr oedd yr hen feirdd Cymreig, yn nyddiau Harri’r Wythfed ac Elizabeth, yn hoff iawn o ganu mewn cadwynau o’r fath yma; ac y mae yn rhyfedd iddynt allu cyflawni y fath orchestion ar ganu ynddynt ag a wnaethant.

Cân o fawl yw y salm, lle y mae y Salmydd, megys y gwnaethai lawer gwaith o’r blaen, yn galw ar ereill i uno âg ef yn y gwaith o glodfori Duw, ar gyfrif mawredd ei weithredoedd, mawredd ei drugaredd, a’i raslonrwydd; mawredd ei gyfiawnder a’i uniondeb fel Llywydd a Barnydd pawb; sicrwydd ei dystiolaethau a’i orchymynion, a chadernid ei gyfammod, & c.; ac mai “dechreuad doethineb yw ofn yr Arglwydd.”