Salmau 94 - Welsh Metrical Psalms by William Rees 1875

SALM XCIV.8.7.3.

1O Dduw ’r dial! ymddisgleiria:

2Cyfod, Farnwr mawr y byd,

Tâl i’r beilchion wobr eu trahâ,

3Pa’m yr oedi di gyhyd?

Dyro glwy iddynt hwy,

Fel na orfoleddont mwy.

4Dros ba hyd y cânt lefaru

Geiriau celyd a sarhaus?

Ymfawrygu mae gweithredwyr

Anwireddau yn barhaus:

5Dryllio ’th saint, Arglwydd maent,

Yn eu llid, fel ysol haint.

6Y weddw wan a’r ddyeithr laddant,

’R amddifad nid arbedant chwaith;

7D’wedant hwy, Ni wêl yr Arglwydd —

Nid ystyria Duw ein gwaith.

8Ystyriwch chwi, wŷr di‐fri,

Ac attebwch hyn i ni —

9Oni chlyw yr hwn a blana ’r

Glust i glywed yn y pen?

Oni wêl ’r hwn luniai lygad

Dyn i wel’d goleuni ’r nen?

10Ef a ddyd, yn ei bryd,

Farn a chosp ar bobloedd byd.

11Gŵyr yr Arglwydd holl feddyliau

Dyn — mai gwagedd ynt, a gau;

12Gwyn ei fyd yr hwn geryddi

Di, i’w ddysgu i’w wellhau:

13Llonydd da, a fwynhâ,

Ond yr annuw i’r ffos yr ä.

14Canys Duw ni âd ei bobl,

Ac ni wrthyd ef ei saint;

15Barn a ddychwel at gyfiawnder,

Etifeddant hwythau ’r fraint.

Dilyn Duw, rhodio a byw,

Wnant yn ol ei ddeddfau gwiw.

Rhan

II.

8.7.3.

16Gyda mi pwy gwyd yn erbyn

Gwŷr drygionus, anwir lu?

Pwy saif gyda mi i wrth’nebu

Gweithwyr brwnt anwiredd du?

17-18Duw fu’n blaid im’ wrth raid,

Neu syrthiaswn yn y llaid.

20A fydd i ti gydymdeithas

A gorseddfaingc fawr y fall?

’R hon a lunia yn lle cyfraith

Anwireddau yn ddiball?

21Do’nt yn un a chyttûn,

I ddyfetha ’r gwirion ddyn.

22Ond yr Arglwydd sydd yn noddfa

I mi — ef a’m ceidw ’n fyw;

Yn mhob adfyd a chyfyngder,

Craig fy nodded yw fy Nuw.

23Tỳr o’r byd, yn ei lid,

Y drygionus oll i gyd.

Nodiadau.

Yn nghyfrif Dafydd y rhoddir y salm hon etto gan y nifer mwyaf o esbonwyr. Os efe oedd ei hawdwr, rhaid ddarfod iddo ei chyfansoddi cyn ei ddyrchafiad i’r orsedd, pan yr oedd efe yn cael ei erlid gan Saul a gwŷr ei lys, a llawer o rai diniwed ereill yn dioddef gorthrymder oddi wrth farnwyr anghyfiawn a chreulawn o’r fath a ddisgrifir, ac y traethir barn yn eu herbyn yn y salm; ac y gweddïir hefyd am i Farnydd Goruchaf yr holl ddaear brysuro i waredu ei bobl orthrymedig o’u dwylaw gwaedlyd, a gwneyd barn arnynt hwythau eu gorthrymwyr. Ceir ynddi hefyd rai appeliadau pwyntiog iawn at reswm a chydwybod y barnwyr traws (adn. 8, 9, 10), a chysuron melusion i’r trueiniaid gorthrymedig (adn. 14, 15).