Salmau 146 - Welsh Metrical Psalms by William Rees 1875

SALM CXLVI.M. C.

1-2Molwch yr Arglwydd. Mola di,

Fy enaid — traetha ’i glod,

Heb beidio byth, heb dewi mwy,

Tra’n berchen byw, a bod.

3Na roddwch bwys eich hyder byth

Ar dywysogion byd,

Nac ar fab dyn — nid yw ond gau,

Anwadal frau ei fryd.

4Ei anadl allan ä, a llwch

Y ddaear fydd ei le;

A dyna’r dydd y derfydd am

Ei holl amcanion e’.

5Gwyn fyd y dyn yr hwn y mae

Duw Iago iddo ’n dŵr;

Ei obaith yn yr Arglwydd sydd —

Diogel fydd y gŵr.

6Yr hwn a wnaeth y nef a’r llawr,

Y moroedd mawr, ac oll

Sydd ynddynt hwy, fe geidw o hyd

Ei wir i gyd heb goll.

Rhan

II.

M. C.

7I’r gorthrymedig y gwna farn,

Portha ’r newynog prudd:

A’r carcharorion blin eu byd,

A esyd ef yn rhydd.

8Fe egyr lygaid deillion gwael

I wel’d goleuni ’r wawr,

A chwyd y rhai ostyngwyd i

Drueni llwch y llawr.

Yr Arglwydd hoffa’r cyfiawn rai,

9Dyeithriaid geidw ef;

’R amddifad trist, a’r weddw wan,

Ddeil â’i ddeheulaw gref.

Ond ffordd yr annuwiolion oll

A ddadymchwela efe,

A’u coffadwriaeth a ddileir

Yn llwyr o dan y ne’.

10Yr Arglwydd a deyrnasa byth,

Dy Dduw di, Seion, yw:

O oes i oes, heb drangc na phall,

Molwch yr Arglwydd Dduw.

Nodiadau.

Y mae dosbarth newydd, a’r dosbarth olaf o’r Salmau, yn dechreu yn y salm hon. Gelwir salmau y dosbarth hwn ‘yr Haleluiau,’ am fod pob un yn dechreu ac yn diweddu gyda’r gair Haleluia; hyny yw, Molwch yr Arglwydd. Tybir iddynt gael eu cyfansoddi ar ol y dychweliad o Babilon. Cynnwysa y salm hon, heb law mawl, addysg ac athrawiaeth dda. Dengys ofered yw ymddiried mewn dyn, beth bynag fyddo ei sefyllfa, am nad oes iachawdwriaeth ynddo, ac o herwydd ei fod yn gyfnewidiol a marwol; a dedwyddwch yr hwn sydd yn ymddiried yn yr Arglwydd, Creawdwr nefoedd a daear, yn yr hwn y mae cadernid tragwyddol, ac sydd “yn cadw gwirionedd yn dragywydd,” yn anghyfnewidiol ffyddlawn i’w air a’i addewid. Gellid cymmhwyso yr wythfed adnod at y Messiah, fel rhagfynegiad am dano, yn briodol iawn; canys cyflawnwyd ei geiriau i’r llythyren ganddo ef. Y mae rhan o’r etifeddiaeth fras sydd yn yr Ysgrythyr i’r amddifad a’r weddw hefyd yn niwedd y salm.