Salmau 58 - Welsh Metrical Psalms by William Rees 1875

SALM LVIII.7au.I’r Pencerdd, Al‐taschith, Michtam Dafydd.

1Ai cyfiawnder yn ddiau

Draethwch chwi, gynghorwyr gau?

Ai uniondeb fernwch chwi,

Feibion dynion uchel fri?

2Anwir waith yn hytrach sydd

Yn eich calonau nos a dydd;

Trawsder mawr eich dwylaw câs

Bwyswch hwyr a boreu glas.

M. H.

3O’r groth yr holl annuwiol rai

A gydymlygrent yn eu bai;

O’r bru y cyfeiliornent hwy,

Gan ddywedyd celwydd fwy na mwy;

7au.

4Megys gwenwyn sarph mae llid

A gwenwyn eu calonau i gyd;

Ar a than eu tafod câs

’R erys beunydd — wŷr diras.

M. H. D.

Maent fel y neidr fyddar fud,

Yr hon a gau ei chlustiau ’nghyd;

5Ni wrendy ar lais y rhiniwr mwyn,

Er cyfarwydded fyddo ’r swyn:

6Dryllia, O Dduw! eu dannedd dig,

Yn eu geneuau tòr eu brig,

Dryllia, tòr gilddannedd llym

Y llewod ieuaingc mawr eu grym.

7Gwna di hwy fel dwfr y sydd

Yn rhedeg ymaith nos a dydd;

Pan saethent hwy eu saethau, pâr

Nad allont gyrhaedd nôd eu bâr:

8Aent ffwrdd fel tawdd‐falwoden wael,

Neu erthyl na chadd wel’d yr haul;

9Cyn i’w crochanau deimlo gwres

Eu ffaglau tanynt, darffo ’u lles.

Duw a’u dwg ymaith oll i gyd,

Megys â chorwynt yn ei lid —

10Y cyfiawn yntau lawenhâ

Pan welo ’u dial a’u trahâ —

Pan ylch efe ei draed mewn llyn

O waed yr annuwiolion hyn;

11Fel d’wedo dyn, “Diau fod ffrwyth

I’r da — a Duw i dalu ’r pwyth.”

Nodiadau.

Troi yn chwerwlym ar ei gyhuddwyr anghyfiawn, sef cynghorwyr gwenieithus Saul, y mae Dafydd yn nechreu y salm hon. Wedi rhoddi disgrifiad o’u drygedd, eu malais, a’u creulondeb, cyhoedda y dinystr llwyr a fyddai yn sicr o’u goddiweddyd. Pe y cesglid yr holl hanesion am y barnau amlwg a ddisgynasant erioed ar lywodraethwyr gorthrymus, a barnwyr traws ac anghyfiawn, gwnaent swm mawr o gyfrolau. Y mae taranau bygythion Duw yn erbyn y rhai hyn i’w clywed yn rhuo drwy yr holl Ysgrythyrau — yn fwy felly, gyda golwg ar farnau tymmorol, nag yn erbyn un dosbarth arall o droseddwyr. Gweddïa y Salmydd yma am i farnedigaeth amlwg felly ddal ei erlidwyr trawsion ef, fel y gwelai ac yr ofnai dynion ereill, ac y dywedent, “Diau fod ffrwyth i’r cyfiawn: diau fod Duw a farna ar y ddaear.”

Ar yr ymadrodd, “Cyn i’ch crochanau glywed y mieri” (adn. 9), methais a chael un eglurhâd a roddai i mi ronyn o foddlonrwydd gan un esboniwr, ac nid oes genyf yr un fy hun i’w gynnyg.