Salmau 98 - Welsh Metrical Psalms by William Rees 1875

SALM XCVIII.M. B.Salm.

1Rho’wch fawl i’n Harglwydd glân,

Mewn newydd gân hyd nef;

Gorchfygodd ei elynion llym

A grym deheulaw gref.

2Hysbysu i ni a wnaeth

Ei iachawdwriaeth fawr;

Dadguddiodd ei gyfiawnder pur

I euog deulu ’r llawr.

3Fe gofia ammod hedd

Ei hen drugaredd wiw;

Caiff holl genhedloedd daear gaeth

Wel’d iachawdwriaeth Duw.

4-6Cydgenwch fawl cyttûn

Ar delyn felus dant;

A moeswch salm ar lafar lef

I’w enw ef — y Sant.

7Cyduned tonau ’r môr

Eu mawl i’n Iôr o hyd;

A rhoed y ddaear fawr, a’i phlant,

Ogoniant iddo i gyd.

8Llifeiriaint oddi draw

Ddyrchafo ’u dwylaw ’n hy’;

Adseinied clod yn uchel floedd

O’r holl fynyddoedd fry.

9O flaen Iehofah sy

Yn d’od i farnu ’r byd:

Efe a esyd gyfiawn raith,

Yn ol eu gwaith i gyd.

Nodiadau.

Y gair salm yn unig a osodir fel teitl i hon, heb un hysbysiad pwy ydyw ei hawdwr. I Dafydd y rhoddid hi gan yr Iuddewon a’r Groegwyr gynt; ac nid oes neb, ar a wyddom, yn ceisio ei dwyn hi oddi arno. Y mae llawer o ddelw y tair salm o’r blaen arni, ac y mae amryw o ymadroddion Salm xcvi. ynddi.

Yr oedd Dafydd, pan y cyfansoddai y salmau hyn, megys wedi ei lyngcu i fyny gan ysbryd ac awyddfryd gwresoglawn i foliannu yr Arglwydd ei hun, ac i annog pawb a phob peth i wneyd yr un modd; a hyny yn y rhagolygon ar ddyddiau y Messiah, pan y dadguddid gras ac iachawdwriaeth Duw trwy’r efengyl yn ngolwg yr holl genhedloedd.

Y mae y “dirgelwch,” fel y geilw Paul ef (Eph. iii. 3), o alwedigaeth y Cenhedloedd i fod yn gydetifeddion, ac yn gydgorph, ac yn gydgyfranogion â hâd Abraham o addewid Duw yn Nghrist trwy’r efengyl, yn nawsio allan drachefn a thrachefn yn salmau olaf Dafydd. Ambell belydryn disglaer o hono yn tori allan yn awr ac eilwaith, a daflai oleuni gobaith i dir y tywyllwch a chysgod angeu yr oedd y Cenhedloedd yn eistedd ynddo.