Salmau 31 - Welsh Metrical Psalms by William Rees 1875

SALM XXXI.8.7.3.I’r Pencerdd, Salm Dafydd.

1Arglwydd, ymddiriedais ynot;

Na’m gw’radwydder: ti, o’th lys,

2Gostwng ataf glust i’m gwrandaw,

Cynnorthwya fi ar frys:

’Rwyf yn wan, dal fi i’r lan,

Bydd dy hunan ar fy rhan.

3Can’s fy nghraig a’m hamddiffynfa

Gadarn, Arglwydd, ydwyt ti;

Ac, gan hyny, er mwyn d’ enw,

Cadw, tywys, arwain fi:

4Tyn dy was, trwy dy ras,

O holl faglau ’r gelyn cas.

5I dy law gorch’mynaf f’ysbryd,

Ti ’m gwaredaist, Arglwydd Dduw;

6Cas yw genyf bawb a ddaliant

Ar oferedd gwagedd gwyw:

Ynot ti, Arglwydd cu,

’N wastad y gobeithiaf fi.

7Llawenhâf ac ymhyfrydaf

Yn dy hen drugaredd gu;

Gwelaist f’ adfyd, adnabuost

F’ enaid mewn cyfyngder du:

8Ni chadd grym gelyn llym

Lwyddo yn fy erbyn ddim.

Rhan

II.

8.7.3.

9Trugarhâ, mae ’n gyfyng arnaf —

’Rwy’n dadwino, ’rwy’n gwanhau;

10Mae fy ysbryd, mae fy mynwes,

Mae fy nghalon yn llesghau:

Gofid sydd, nos a dydd,

Yn gwneyd im’ och’neidio’n brudd.

Ochain am fy anwireddau,

Drwy’r blynyddau, ’rwyf o hyd;

Pallai’m nerth, fy esgyrn hefyd,

A bydrasant oll i gyd:

Trugarhâ, Arglwydd da,

Ac iachâ fi, druan cla’!

11Gwarthrudd wyf i’m holl elynion,

A’m cym’dogion ar bob llaw;

Dychryn i’r rhai a’m hadwaenant,

Ciliant oll oddi wrthyf draw:

12Gwael yw’m gwedd, ddyn dihêdd,

Fel un marw yn ei fedd.

13Clywais ogan brwnt llaweroedd,

Ymgynghorant hwy ynghyd,

Gan fwriadu ’m dieneidio;

Yn nghynddaredd llym eu llid:

14Ond myfi, ynot ti,

O fy Nuw! fy ngobaith sy.

Dywedais mai fy Nuw i ydwyt,

15Mae f’ amserau yn dy law,

Gwared fi o law ’m gelynion,

Sydd yn peri i mi fraw:

16Gwên dy ras, rho i’th was,

Sydd fel gwin pereiddia’i flas.

Rhan

III.

8.7.3.

17-18Na’m gw’radwydder, canys gelwais

Ar dy enw, Arglwydd mawr;

Gwaradwydder fy ngelynion,

Torer hwy yn llwyr i lawr:

Yn y bedd, cuddia ’u gwedd,

Felly minnau a gaf hedd.

Y rhai dd’wedant eiriau celyd,

I ddiystyru ’r cyfiawn rai,

Gwarth a gw’radwydd a’u gorchuddio

’N daledigaeth am eu bai:

Syrthiont hwy dan eu clwy,

Fel darfyddo am danynt mwy.

19Rhoist oludoedd o fendithion

A daioni ’nghadw ’nghudd;

Fel y caffo’r sawl a’th ofnant,

Eu mwynhau yn llawn ryw ddydd:

Pan y dêl, yn ddigêl,

Meibion dynion oll a’i gwêl.

20Cuddi hwy ’n nirgelfa ’th wyneb,

Rhag balchineb gwŷr di‐ras;

Cuddi hwy mewn pabell dawel,

Rhag cynhenau ’r tafod câs:

Cuddi hwy, ni chânt mwy,

Deimlo niwed byth na chlwy.

Rhan

IV.

8.7.3.

21Bendigedig fyddo ’r Arglwydd,

Rhyfedd y dangosodd ef,

Garedigrwydd im’ pan oeddwn

Wedi ’m cau mewn dinas gref:

22Yn fy nghri, gwaeddais i —

Bwriwyd fi o’th olwg di.

Ond er hyny ti wrandewaist

Pan ddyrchefais atat lef;

23Chwi, holl saint yr Arglwydd, cenwch

Cenwch, a chlodforwch ef:

Ceidw Duw, cadarn yw,

Ei ffyddloniaid oll yn fyw.

Ef a dâl i’r rhai wna falchder,

Yn ehelaeth;

24ond y rhai

A obeithiwch yn yr Arglwydd,

Ymwrolwch, gwna ’ch cryfhau:

Dyrchwch lef, hyd y nef,

Molwch oll ei enw ef.

Nodiadau.

Y mae cŵynion trymion, ymbiliau taerion, a diolchiadau gwresog, megys yn gymmhlethedig â’u gilydd yn y salm hon:— cŵynion o herwydd rhyw drallod mawr, ymbiliau am ymwared o’r trallod hwnw; a mawl a diolch am yr ymwared wedi ei gael. Y mae trallod yn fendithiol i’r enaid, pan y mae yn ei ddwyn i weddïo; ac y mae ymwared o drallod yn dwyn ei ffrwyth priodol, pan y mae yr hwn a waredwyd yn dychwelyd i dalu diolch i’w waredydd. Y mae llawer mewn trallod nad ydynt byth yn gweddïo; ac ereill a weddïant yn nydd eu trallod, ac anghofiant ddiolch ar ol cael eu gwaredu o hono. Ond y mae holl gŵynion ac ymbiliau y Salmydd yn hon, a’i salmau ereill ef, yn troi yn fawl a diolch wedi iddo gael ei waredu.

Wedi iddo gael ei waredu o law Saul yn anialwch Mahon (1 Sam xxiii. 26-29), lle y bu mewn enbydrwydd mawr am ei einioes, y cyfansoddodd efe y salm hon, fe dybir. Yr oedd Saul a’i wŷr wedi ei amgylchynu y tro hwnw, fel yr ymddangosai braidd yn ammhossibl iddo ddiangc; ond daeth cenad at Saul yn hysbysu fod y Philistiaid wedi ymdaenu ar hyd y wlad i’w hanrheithio, fel y bu raid iddo adael Dafydd, a myned yn erbyn y gelynion hyny.

Ag ymadrodd o’r salm hon y cyflwynodd y Gwaredwr ei hun i ddwylaw ei Dad wrth drengu ar y groes:— “I’th ddwylaw di, y gorchymynaf fy ysbryd.”