Salmau 136 - Welsh Metrical Psalms by William Rees 1875

SALM CXXXVI.8.7.4.

1-3Da yw’r Arglwydd, ef clodforwch,

Duw y duwiau ydyw ef;

Arglwydd mawr yr holl arglwyddi,

Yn, ac oddi tan y nef:

Yn dragywydd,

Ei drugaredd sy’n parhau.

4-6’R hwn sy’n gwneuthur rhyfeddodau;

Mewn doethineb gwnaeth y nef;

Seilio’r ddaear ar y dyfroedd

Wnaeth â’i fraich alluog gref;

Yn dragywydd,

Ei drugaredd sy’n parhau.

7-9Fe wnaeth oleuadau mawrion;

’R haul i lywodraethu’r dydd,

Lloer a sêr y nos i weini

Eu goleuni siriol sydd:

Yn dragywydd,

Ei drugaredd sy’n parhau.

Rhan

II.

8.7.4.

10-11’R hwn darawai gyntafigion

Gwlad yr Aipht, a dug yn rhydd

Israel, ei ddewisol bobl,

Allan o’u caethiwed prudd:

Yn dragywydd,

Ei drugaredd sy’n parhau.

12-14A llaw gref, a braich alluog,

Rhanodd y Môr Coch yn ddau;

Gwnaeth i Israel fyn’d trwy ’i ganol

Heb arswydo na llesghau:

Yn dragywydd,

Ei drugaredd sy’n parhau.

15-16Pharaoh a’i lu ’n y môr ysgytiodd,

Yno darfu am danynt mwy;

Trwy’r anialwch aeth â’i bobl,

Yn ddiogel t’wysodd hwy:

Yn dragywydd,

Ei drugaredd sy’n parhau.

Rhan

III.

8.7.4.

17-18T’rawodd ef frenhinoedd cryfion

Lawr i’r llwch yn ngrym ei lid;

Lladdodd benaduriaid enwog,

Barent ddychryn yn y byd:

Yn dragywydd,

Ei drugaredd sy’n parhau.

19-20Sehon, brenin yr Amoriaid,

Ydoedd un rhoes arno ball;

Og, y cadarn gawr o Basan,

Dychryn dynion, oedd y llall:

Yn dragywydd,

Ei drugaredd sy’n parhau.

21-22Rhoes eu tir yn etifeddiaeth

I’w ddewisol bobl ei hun,

Canys ef a bïau’r ddaear

Oll, a’i gwledydd bob yr un:

Yn dragywydd,

Ei drugaredd sy’n parhau.

Rhan

IV.

M. S.

23-24Yn ein hisel‐radd fe’n cofiodd;

Ac o law’n gelynion câs

Dug ni’n rhyddion i’w foliannu

Am ei ryfedd, ryfedd ras:

Yn dragywydd,

Ei drugaredd sy’n parhau.

25-26I bob cnawd y dyry ymborth;

Pery ei drugaredd ef

Yn dragywydd — O! clodforwch,

Am ei fawredd, Dduw y nef:

Yn dragywydd,

Ei drugaredd sy’n parhau.

Nodiadau.

Yr un yw mater a sylwedd y salm hon a’r salm o’r blaen, ond yn wahanol ei chyfansoddiad. Y mae y fawl‐wers, “O herwydd ei drugaredd sydd yn parhau yn dragywydd,” yn fyrdwn bob yn ail llinell ynddi o’r dechreu i’r diwedd, yn ol ordeiniad Dafydd i’r cantorion wrth foliannu’r Arglwydd (1 Cron. xvi. 41): ac a ddilynwyd gan Solomon wrth gyssegru y deml (2 Cron. vii. 3-6); a chan Iehosaphat (2 Cron. xx. 21). Llawer gwaith y llanwyd heolydd Ierusalem gan acenau moliant y salm hon gan y cantorion a’r cerddorion ar y gŵyliau arbenig, pan ymgynnullai y llwythau ynghyd i foliannu enw’r Arglwydd, ac yr amgylchynent ei dŷ â chaniadau clodforedd. Yr oedd priodoldeb mawr yn yr ymadrodd “yr hwn sydd yn cyfanneddu yn moliant Israel.”