Salmau 149 - Welsh Metrical Psalms by William Rees 1875

SALM CXLIX.8.7.

1Molwch enw’r Arglwydd: cenwch

Ganiad newydd, uchel fraint;

Dyrchwch beraidd lawen foliant,

Iddo ’n nghynnulleidfa’r saint.

2Llawenhaed ei bobl, Israel,

Yn yr hwn roes iddynt fod:

Gorfoledded meibion Seion,

Yn eu Brenin, mawr ei glod.

5Llawenhaed y saint, a chanant

Ar eu gwelyau yn ddi‐daw:

6Moliant Duw fo yn eu genau,

Cleddyf deufin yn eu llaw:

7I roi dial ar genhedloedd,

Barn a chosp ar bobloedd byd,

8I rwymo teyrniaid a phenaethiaid

Mewn gefynau heiyrn ynghyd.

9I weinyddu ’r farn ’sgrifenwyd

Arnynt hwy yn llyfrau ’r nef:

’R ardderchawgrwydd hwn a berthyn

I’w holl saint a’i bobl ef.

Nodiadau.

Mawl un am ryw fuddugoliaeth fawr, neu waredigaeth hynod a gawsai Israel, ydyw y salm hon, fel amryw salmau ereill. Gelwir hi yn “ganiad newydd.” Y mae amlygiad newydd o ddaioni Duw i’w bobl yn galw am gân newydd o fawl a diolchgarwch am dani. Pa faint amlach yw trugareddau newyddion Duw i ni nag ydyw ein diolchiadau newyddion ni iddo ef? Geilw y Salmydd ar ffyddloniaid Israel i lawenhau yn eu Duw, a mawrhau ei enw, am eu rhagorfreintiau rhagorol fel ei bobl ddewisedig ef.