Salmau 135 - Welsh Metrical Psalms by William Rees 1875

SALM CXXXV.

1Molwch yr Arglwydd, clodforwch ei enw,

Chwi weision Iehofah, moliennwch e’ i gyd;

2Chwi sydd yn sefyll o fewn i gynteddau

Tŷ’r Arglwydd ein Duw, rhowch fawl iddo ’nghyd.

3Molwch yr Arglwydd, canys da yw yr Arglwydd;

Cenwch i’w enw, gwaith hyfryd iawn yw;

4Yr hwn iddo ’i hun ddewisodd hâd Iago,

Ac Israel yn bobl briodol i Dduw.

5O blegid mae’n hysbys i ni fod Iehofah

Goruwch yr holl dduwiau, yn anfeidrol fawr;

6Fe wnaeth ’rhyn a fynai ’n y nefoedd a’r ddaear,

Yn eigion y môr, a dyfnderoedd y llawr.

7Mae’n codi y tarthoedd o eithaf y ddaear;

Y mellt wnaeth efe, y cenllysg, a’r gwlaw;

Ni raid iddo ond galw, y gwynt o’i drysorau

Mewn parod ufudd‐dod yn union a ddaw.

8Tarawodd yr Aipht yn ei chyntafanedig,

Yn ddyn ac anifail, bu ddirfawr eu cur;

9Anfonodd arwyddion a mawr ryfeddodau,

I’th ganol di’r Aipht, ar Pharaoh a’i holl wŷr.

10Yr hwn a darawodd genhedloedd, do, lawer,

A lladdodd frenhinoedd oedd uchel eu bryd;

11Sehon ’r Amoriad, ac Og brenin Basan,

A holl frenhiniaethau Gwlad Canaan i gyd.

12Eu tiroedd a roddodd efe ’n etifeddiaeth

I Israel ei bobl, i’w helaeth fwynhau;

13Dy enw, O Arglwydd! a bery’n dragywydd,

A sôn am dy wyrthiau fydd byth yn parhau.

14Yr Arglwydd a farna ei bobl yn uniawn,

Ac wrth ei drueiniaid efe drugarhâ;

Pan welo ei weision mewn adfyd a chyni,

Efe a dosturia — a’u harbed a wna.

15Holl ddelwau’r cenhedloedd nid y’nt ond eilunod

O aur ac o arian, gwaith dwylaw dyn;

16Y mae genau iddynt, ond hwy ni lefarant,

A llygaid sydd ganddynt, ond ni wêl yr un.

17Y mae clustiau iddynt, ond clywed nis gallant;

Dim bywyd nac anadl i’w genau nid oes;

18A thebyg yw’r dynion diddeall a’u gwnaethant,

A phawb ynddynt hwy eu hymddiried a roes.

19Tŷ Israel, bendithiwch chwi ’r Arglwydd Iehofah;

Tŷ Aaron

20a Lefi, bendithiwch e’nghyd;

Rhai ofnwch yr Arglwydd, yn fychain a mawrion,

Bendithiwch, bendithiwch yr Arglwydd o hyd.

21Bendithier yr Arglwydd o Seion yn wastad,

Chwychwi, sydd yn trigo yn Salem, na thewch;

Datgenwch ogoniant ei enw bob amser,

Rhowch ynddo ’ch ymddiried, a chydlawenhewch.

Nodiadau.

Bernir mai hymn foreuol yw y salm hon, i’w chanu ar agoriad drysau tŷ’r Arglwydd yn y boreu, fel yr oedd y salm o’r blaen yn emyn hwyrol. Yma yr adgofir amryw o fawrion weithredoedd yr Arglwydd, a wnaethai efe ar Israel er cymmhell Israel i’w fawrhau a’i foliannu wrth goffadwriaeth y gweithredoedd hyny. Y mae y gwirionedd mawr yr oedd y genedl etholedig wedi ei galw a’i bwriadu i fod yn dyst o hono yn y byd, sef mai Iehofah yw yr unig wir a bywiol Dduw, yn cael lle arbenig yn y gân, er ei gadw yn wastad ar galon ac ar dafod Israel. Tywelltir yma y dirmyg mwyaf ar dduwiau a delwau y Cenhedloedd, ac ynfydrwydd y rhai a’u gwnaent ac a’u haddolent; a chymmhellir Israel i lynu yn ddiymmod wrth addoliad a gwasanaeth Iehofah, yr hwn a wnaethai gymmaint erddynt a throstynt, ac i ymddiried ynddo rhag llaw. Y mae yr Arglwydd am i’w bobl gadw ei weithredoedd gynt mewn côf, ei foliannu am danynt, a’u gwneyd yn seiliau i ymddiried ynddo byth.