Salmau 129 - Welsh Metrical Psalms by William Rees 1875

SALM CXXIX.8.7.Caniad y Graddau.

1Llawer gwaith y’m cystuddiasant,

O’m hieuengctid hyd yn awr;

Felly dichon Israel ddywedyd

Gyda phriodoldeb mawr.

2Llawer gwaith y’m cystuddiasant

O’m hieuengctid, etto i gyd

Ni’m gorfuant, byw wyf heddyw

Er eu gwaethaf oll ynghyd.

3Ar fy nghefn estynai ’r arddwyr

Gwysau hirion dyfnion iawn;

Drwy fy natur gwnaent aredig

Clwyfau mewn creulondeb llawn.

4Cyfiawn yw Iehofah, torodd

Offer trais yr anwir lu;

5Trodd yn ol a gwaradwyddodd

Holl gaseion Seion gu.

6Byddant oll un fath a’r glaswellt

Sydd yn tyfu ar benau tai;

’R hwn cyn torir ef, a wywa —

Felly byddant hwy bob rhai.

7Hwn ni leinw law ’r pladurwr,

Mynwes rhwymwr ’sgubau chwaith;

8Ac ni dd’wed y rhai ânt heibio

Bendith Duw fo ar y gwaith.

Nodiadau.

Yma, teflir golwg yn ol ar y gwasgfeuon a’r cyfyngderau y daeth y genedl etholedig drwyddynt yn ngwahanol gyfnodau ei hanes. Yr oeddynt yn llawen. Ymosodasai llawer o elynion cryfion a chreulawn arni, o ddyddiau ei gorthrymder yn yr Aipht, yn nhymmhor ei hieuengctid, hyd ddyddiau y Salmydd, a bu megys yn ymyl darfod am dani byth aml dro; ond diangodd yn fyw drwy bob cyfyngder. Darfu am lawer o’i gelynion, torwyd ymaith lawer cenedl a fuasai yn ei gorthrymu fel glaswellt penau’r tai, a hithau wedi byw i lawenhau a chanu ar achlysur eu cwymp. Cydnabydda y Salmydd law Duw yn holl waredigaethau ei bobl, a chwymp a dinystr eu gelynion, gan briodoli yr holl ogoniant iddo ef; a phrophwyda mai i’r dynged druenus y deuai holl elynion Duw a’i bobl yn y diwedd.

Megys y gallasai Israel Duw ddywedyd yn amser y Salmydd am ei gelynion, ei phrofedigaethau, a’i gwaredigaethau hi, y gall eglwys Dduw ddyweyd yr awr hon etto. Cyfododd llaweroedd o elynion cryfion a chreulawn i’w herbyn; “estynasant eu cwysau yn hirion ar ei chefn” lawer gwaith wedi hyny; etto ni orfuant arni. Gofalodd Ceidwad Israel am dani. Darfu am luoedd o elynion yr eglwys Gristionogol ar ol eu gilydd; gwywodd eu galluoedd fel glaswellt penau tai; ond y mae hi etto yn fyw, yn tyfu ac yn ffrwytho, fel y bu i’r hen eglwys Iuddewig a’i gelynion, ac fel y bydd etto — hyd oni wywa y gelyn olaf, ac y llwyr waredir ac y gogoneddir hithau.