Salmau 20 - Welsh Metrical Psalms by William Rees 1875

SALM XX.8au.I’r Pencerdd, Salm Dafydd.

1Duw wrandawo o’r uchelder

Ar dy weddi yn nydd cyfyngder;

Enw mawr Duw Iacob fyddo

’N babell i ti i breswylio.

2Rhodded i ti gymmhorth parod

O’i gyssegrfa sanctaidd uchod;

Nerthed ef dydi o Seion,

Lle trysorodd bob bendithion.

3Cofied ef dy boeth‐offrymau,

Bydded foddlawn i’th aberthau;

4Rhodded i ti wrth fodd dy galon,

A chyflawned dy gynghorion.

5Gorfoleddwn â’n holl galon

Yn dy iachawdwriaeth dirion;

Yn ei enw codwn faner,

Fe’n bendithia â phob cyflawnder.

Rhan

II.

8au.

6Gwn yn awr gwareda’r Arglwydd

Ei Eneiniog rhag pob aflwydd;

Gwrendy ef o’r nefoedd arnaw,

Yn nerth iechyd ei ddeheulaw.

7Mewn cerbydau rhai ymffrostiant,

Ereill yn eu meirch hyderant;

Ond nyni a ro’wn ein gobaith

Byth yn Nuw ein hiachawdwriaeth.

8Hwy i lawr a gydsyrthiasant,

A chyfodi byth nis gallant;

Ninnau ar ein traed godasom,

A diysgog y safasom.

9Achub, Arglwydd, gwrandaw’n wastad,

Yn y dydd y llefom arnad;

Ti yw’n Brenin, Ti yw’n cysgod;

Byth yr ymddiriedwn ynod.

Nodiadau.

Cyfansoddodd Dafydd y salm hon, fe ymddengys, pan yr oedd efe ar fyned allan gyda’i luoedd yn erbyn rhywrai o’i elynion. Oddi wrth yr ymadrodd yn adn. 7, “Ymddiried rhai mewn cerbydau, a rhai mewn meirch,” tybir mai ei hynt filwraidd yn erbyn Hadadezer, brenin Sobah, a’r Syriaid a ddaethent i’w gynnorthwyo, ydoedd, pan yr ennillodd efe oddi ar y brenin hwnw “fil o gerbydau, a saith gant o farchogion, ac ugain mil o wŷr traed;” 2 Sam viii. 4. Cyflwynai y salm i’r pencerdd, a’r cantorion, i’w chanu a’i gweddïo yn y tabernacl, am lwyddiant eu brenin a’i wŷr. Teimlai ef yn gwbl sicr o fuddugoliaeth ar ei elynion hyny, er eu holl gadernid mewn meirch a cherbydau, cyn iddo gychwyn allan yn eu herbyn, gan mor ddiysgog oedd ei ymddiried yn nawdd a chymmhorth ei Dduw.

Yr oedd rhyfeloedd Dafydd, gan mwyaf beth bynag, yn “rhyfeloedd yr Arglwydd.” Ymosodai y Cenhedloedd eilunaddolgar o amgylch ar Israel, fel cenedl o bobl oedd yn eu canol yn gwrthod ac yn dirmygu eu duwiau hwy fel eilunod meirwon a mudion; ac yn addoli un Duw anweledig, gan broffesu eu hunain yn bobl etholedig yr unig wir Dduw hwnw. Yr oedd rhyfeloedd y Cenhedloedd hyny felly yn rhyfeloedd yn erbyn Iehofah ei hun. Yr un modd yn gwbl yr oedd ymosodiadau creulawn ymherodraeth Rhufain baganaidd ar y Cristionogion yn y canrifau cyntaf. Gwreiddyn yr holl erledigaethau ofnadwy hyny oedd eu gwrthodiad hwy i gydnabod ac addoli ei duwiau hi. Nid âg arfau milwriaeth Dafydd yr oeddynt hwy i ymladd a gorchfygu, ond trwy waed yr Oen, a gair eu tystiolaeth hwy.