Salmau 113 - Welsh Metrical Psalms by William Rees 1875

SALM CXIII.8.8.6.

1Clodforwch chwi yr Arglwydd Dduw:

Ei weision ef, can’s sanctaidd yw,

Molwch ei enw mawr;

2Bendigaid yw, bendigaid fydd,

Ef o hyn allan yn ddi‐ludd,

Tra treiglo oesau’r llawr.

3O godiad hyd fachludiad gwawr,

Moliannus yw ei enw mawr;

4Uchel yw ef uwch law

Yr holl genhedloedd yn y byd,

Uchel uwch law y nef i gyd;

Ei fath ni fu, ni ddaw.

5Pwy fel Iehofah ein Duw ni

Sy’n uchel mewn anfeidrol fri,

6Ac yn ymostwng ’lawr,

I edrych ar y pethau sy’

’N y nef, ac ar y ddaear ddu:

Efe ei hun sydd fawr.

7Efe sy’n codi ’r tlawd o’r llwch,

A’r truan gwael o’r domen drwch,

Lle ’r oe’nt yn wael eu gwedd:

8I’w gosod hwy yn hardd eu drych

Yn mysg ei bendefigion gwych

I gydfwynhau ei hedd.

9’R hwn wna i’r ammhlantadwy, fu

’N amddifad brudd, i gadw tŷ,

Yn llawen fam i blant:

Am hyny deued, heb nacau,

Y truain a’r cystuddiol rai,

I gydfoliannu’r Sant.

Nodiadau.

Yr oedd y salm hon, medd athrawon Iuddewig, yn gân deuluaidd gan yr Hebreaid, a dadgenid hi ganddynt hefyd yn gymdeithasol ar eu newydd-loerau, a’u gŵyliau, ac yn neillduol ar nos eu Pasc, wedi iddynt fwyta oen y Pasc. Gelwir ar weision yr Arglwydd i’w foliannu ef, ar gyfrif ei oruchelder ar bawb ar y ddaear ac yn y nefoedd. Am ei fod o’r goruchelder hwnw yn ymddarostwng i edrych ar y pethau sydd yn y nefoedd ac yn y ddaear, angylion a dynion, ac yn neillduol ar drueiniaid tlodion, a rhai amddifaid y ddaear, ac yn codi y tlawd o’r llwch, yr anghenus o’r domen, ac yn gwneyd i’r ammhlantadwy gadw tŷ, a bod yn llawen fam plant. Nid oes neb yn mysg pendefigion ei bobl a’i moliannant ef yn fwy melus a gwresog na’r rhai hyny a ddyrchafwyd o lwch tlodi, ac o domenydd trueni y ddaear, i’r anrhydedd a’r gogoniant nefol.