Salmau 121 - Welsh Metrical Psalms by William Rees 1875

SALM CXXI.8.8.6.Caniad y graddau.

1Edrychaf i’r mynyddoedd draw,

O’r fan lle daeth, o’r fan lle daw,

Fy nghymhorth parod iawn;

2Fy nghymhorth ddaw oddi wrtho ef,

Yr hwn a greodd dae’r a nef —

Fy nerth, fy noddfa lawn.

3-4Dy droed i lithro ef ni âd,

Ni huna byth dy Geidwad mâd —

Hen Geidwad Israel yw:

5Bydd ef i’th gadw rhag pob braw,

Yn gysgod ar dy ddeheu law,

Diogel byddi byw.

6Ni thery haul y dydd dy ben,

A’r nos ni’th dery’r lleuad wen,

7Dy Geidwad ydyw Duw:

8Cei fyn’d a dyfod dan ei nawdd,

Ni syrthi mewn na ffos na chlawdd,

A’th enaid byth fydd byw.

Nodiadau.

Yr oedd ysbryd y salmydd mewn hwyl felus yn cyfansoddi y ganig hon — yn llawn o ffydd a hyder yn ei geidwad a’i arweinydd anfeidrol, am bob cymmhorth cyfamserol a diogelwch rhag pob niweidiau tymmorol ac ysbrydol. Dyrchafaf fy llygaid i’r mynyddoedd. — Neu, a ddyrchafaf fi fy llygaid i’r mynyddoedd am nawdd a diogelwch? A hyderaf fi ar y mynyddoedd sydd yn amgylchu Ierusalem i’n cadw rhag gelynion a ddichon ymosod arni? Na: mi a edrychaf yn uwch na’r mynyddoedd — at yr hwn a’u gwnaeth hwynt, “yr hwn a wnaeth nefoedd a daear.” Yna, mewn acenau melusion, efe a ddadgana glod a rhagoriaeth ei geidwad ef, a cheidwad ei bobl, Israel, ar bob ceidwad arall — ei fod yn geidwad nad ydyw byth yn cysgu, yn huno, nac yn hepian, yn geidwad parod, agos wrth law bob amser — ar dy ddeheulaw; yn geidwad rhag pob drwg — rhag pechod, y drwg gwaethaf o’r drygau oll; yn cadw y traed rhag llithro i ddrygau a niweidiau y bywyd hwn; ac yn geidwad enaid i fywyd tragwyddol. Llais un yn canu dan nawdd, amddiffyn, ac arweiniad y Ceidwad hollalluog hwn a glywir yma:— y Ceidwad y cyhoeddodd angel o’r nef y newydd da o lawenydd mawr, yn mhen cannoedd lawer o flynyddoedd ar ol hyn, ei enedigaeth i’r byd “yn ninas Dafydd,” yn achubydd ac iachawdwr i’r holl bobl.