Salmau 133 - Welsh Metrical Psalms by William Rees 1875

SALM CXXXIII.M. C. D.Caniad y Graddau, o’r eiddo Dafydd.

1Wele, mor dda a hyfryd yw,

Fod brodyr yn byw ’nghyd!

2Mae undeb cariad pur y saint

Megys yr enaint drud,

Dywalltwyd ar ben Aaron pan

Wnaed e’n offeiriad Duw,

Yr hwn a redai dros ei farf

Ar hyd ei wisgoedd gwiw.

3Neu fel y gwlith o groth y wawr

Ar fynydd Hermon fry —

Y gwlith ddyhidla’r nef i lawr

Ar fryniau Seion gu;

Can’s yno y gorch’mynodd Duw

Ei fendith fyw i fod,

Sef, bywyd bythol ei barhâd

Er ei dragwyddol glod.

Nodiadau.

Tybir ddarfod i Dafydd gyfansoddi y salm hon pan yn gweled llwythau Israel yn cydymgasglu i’r tu hwnt i’r Iorddonen i’w gyrchu adref yn ol i Ierusalem, wedi ei fföedigaeth rhag ofn y gwrthryfel a gyfodasai Absalom ei fab; ac wrth eu gweled oll mor unol a gwresog ar yr achlysur hwnw, cymmhara undeb a brawdgarwch pobl Dduw i’r enaint gwerthfawr, peraroglus, â’r hwn yr eneinid Aaron i’w swydd offeiriadol, ac i wlith y nefoedd ar fynyddoedd Seion. Cenid y salm hon yn fynych gan y Cristionogion cyntefig, gan ei chymmhwyso at undeb hapus Iuddewon a Chenhedloedd yn un frawdoliaeth yn Nghrist; a byddai yn dda iawn i bob eglwys ei chanu a’i hystyried yn ei chalon. Yn ei hundeb brawdgar y mae nerth a gogoniant pob eglwys; ac os ymedy ef, gellir ysgrifenu ‘Ichabod’ ar ei phyrth.