Salmau 140 - Welsh Metrical Psalms by William Rees 1875

SALM CXL.M. S.I’r Pencerdd, Salm Dafydd.

1O Arglwydd! gwared fi rhag gŵg

Y dynion drwg a thrawsion;

2’Rhai sy’n cynllunio o hyd o hyd,

Ddrygioni ’n mryd eu calon.

Ymgasglu i ryfel beunydd wnant,

3Golymant eu tafodau

Fel sarph, a gwenwyn aspaidd glâs

Sydd dan eu câs dafodau.

4O Arglwydd! cadw fi rhag gwŷr

Traws enwir eu bwriadau,

Y rhai gynlluniant yn eu brâd,

Fachellu ’nhraed i’w rhwydau.

5Y beilchion guddiant faglau fyrdd,

Ar hyd fy ffyrdd a’m llwybrau;

Ac ar fy medr i fel hyn,

Gwnant estyn eu hoenynau.

6Dywedais wrth yr Arglwydd cu,

Fy Nuw wyt ti yn ddiau;

Am hyny gwrandaw di o’r nef

Yn wastad lef f’ymbiliau.

7O Arglwydd Dduw! tydi yw nerth

Fy mhrydferth iachawdwriaeth;

Yn nydd y gâd gorchuddiaist fi,

Mawr weli, rhag marwolaeth.

Rhan

II.

M. S.

8Na chaniatâ, O Arglwydd mâd!

Ddymuniad anwir ddynion,

Rhag os y llwydda y gwŷr hyn,

Balchïant yn eu calon.

9Na’d iddynt hwy o’m cylch sy’n cau

I godi ’u penau ’n uchel;

Boed blinder eu gwefusau anfwyn

I’w dal a’u dwyn yn isel.

10Disgyned arnynt farwor noeth,

I’r ffwrn dân chwilboeth syrthiant;

Ac mewn ceuffosydd bwrier hwy,

A byth mwy ni chyfodant.

11A byth na sicrhaer ar

Y ddaear ddyn drygionus;

Y drwg a hela’r traws ei fryd

I’w ddistryw enbyd gwarthus.

12Mi wn y dadleu Duw o blaid

Y truan enaid gwirion;

Ac y rhydd ef iawn farn ar frys

I’r rhai anghenus tlodion.

13Y cyfiawn a glodforant byth

Dy enw dilyth, Arglwydd;

Trig y rhai uniawn ger dy fron

I gyd yn llon a dedwydd.

Nodiadau.

Y mae y salm hon yn ein troi yn ein hol megys, at amgylchiadau boreuol bywyd Dafydd, gan ei bod yn dwyn delw amryw o salmau a gyfansoddwyd pan yr oedd efe yn cael ei erlid gan Saul, a gwenieithwyr Saul, yn y naill le a’r llall, yn cynllwyno am fantais i’w fradychu i ddwylaw ei elyn marwol hwnw. Bernir mai ar ol corphori salmau ereill Dafydd, o’r gyntaf hyd y ddeuddegfed a thrigain, yn un llyfr, y deuwyd o hyd i’r chwe salm hyn, a rhai ereill o’r eiddo ef, ac i’r hwn a’u cafodd eu gosod a’u cyfleu yn y lle hwn. Cwyno y mae efe yn y salm hon, fel mewn llawer o’r salmau eraill, wrth ei Dduw yn erbyn ei elynion, a gweddïo ar fod iddo gael ei gadw a’i ddiogelu rhag eu maglau a’u drwg‐fwriadau, a thraethu ei hyder yn ei Dduw, fel ei Dduw cyfammodol, y byddai iddo ef barhau i’w waredu a’i fendithio.