Salmos 122 - Biblia Guaraní

Purahéi Jerusalénpe guarã

1Avy'aite chéve oje'e ramo:

“Jaha tupaópe”.

2Jerusalén!

Ne rokẽmema roñembo'y.

3Jerusalén niko táva neporãva,

oñemopu'ã porãitéva.

4Upépe ojupi

Israel ñemoñaregua kuéra,

Ñandejára réra

omomba'e guasúvo,

ojeheja haguéicha chupe kuéra

tembiapoukapy ramo.

5Upépe oguapy

mburuvicha guasu David rogagua,

teko jojápe oporombojovake haguã.

6Pende py'aite guive

peñembo'e pejévo:

“Py'a guapýpe tojeiko Jerusalénpe,

kyhyje'ỹme toiko umi nde rayhúva.

7Py'a guapy toĩ upe táva ryepýpe,

ha mburuvicha guasu rógape.”

8Che ryke'y kuérape

ha umi che kuaáva rayhupápe ajeruréta:

“Py'a guapy toĩ nde pype.

9Tupã Ñandejára róga rehehápe

añembo'éta.”