2 Crónicas 13 - Biblia Guaraní

Abiam oisãmbyhy Judápe(1 R 15.1-7)

1Abiam oñepyrũ oisãmbyhy Judápe, 18 áño oguapy rire mburuvicha guasúrõ Jeroboam.

2Oisãmbyhy Jerusalénpe mbohapy áño pukukue. Isy héra Micaías, Uriel ha Guibeá ñemoñare.

Abiam ha Jeroboam osẽ oñorãirõ oñondive.

3Abiam omoñepyrũ ñorãirõ ha oguereko 400.000 ñorãirõhára poravopyre. Jeroboam katu oñemoĩ hese 800.000 ñorãirõhára poravopyre reheve.

4Upérõ Abiam oñembo'y yvyty Semaraim ru'ãme, oĩva yvyty Efraínpe, ha he'i: “Jeroboam ha opa Israelgua, che rendúke!

5Ndapeikuaái piko Tupã, Israel Jára, ome'ẽ hague Israel retã David ha iñemoñare kuérape opa árape guarã, ome'ẽvo iñe'ẽ ikatu'ỹva oñembotove?

6Opáichavo Jeroboam, Nabat ra'y, Salomón David ra'y rembiguaire, opu'ã ijárare.

7Ha omoirũ chupe tapicha ahẽ, reko rei atýra, ipu'akáva Roboam Salomón ra'yre, ha'e imitã ha ikangýgui gueteri. Upéicha rupi naimbaretéi ombohovái haguã chupe kuéra.

8Ha ko'ágã peẽ peñemoĩse David ñemoñarére, oisãmbyhýva Ñandejára rérape. Pejerovia pende jehe pende retágui ha perekógui tóro ra'ãnga óro, Jeroboam ojapouka vaekue peẽme pene tupã gua'urã.

9Pemosẽ vaekue avei pa'i añetegua, Aarón ñemoñare, ha levíta kuéra, Tupã voi oiporavo vaekue imba'erã, ha pemoĩ hendaguépe pende pa'i gua'urã, ojapoháicha umi tetã ambuegua. Oimeraẽ oguerúva peteĩ tóro ra'y ha 7 ovecha mácho ikatu oñemoingo pa'i ramo tupã japu kuérape guarã.

10Oréve guarã katu Tupã ore Jára upe Tupã añetegua ha ndorojeíri chugui. Pa'i kuéra itupao pegua, Aarón ñemoñare, ha umi oipytyvõva chupe kuéra levíta hína.

11Ha'e kuéra oikuave'ẽ Ñandejárape pyhareve ha ka'aru, mymbahapy*f** ha insiénso,*f** omoĩ henondépe mesa ipotĩva*f** mbuja ñekuave'ẽmbyre reheve, ha ka'aru pytũ oguahẽvo omyendy mba'e rendy pyenda óro ári. Ore rojapo Tupã ore Jára rembiapoukapy, peẽ katu pejei vaekue chugui.

12Pehecha kuaáke aipo ramo, ore ndive oĩha Tupã ha ipa'i kuéra; ko'ãva oĩma ombopu haguãicha ituru kuéra rondyry haguã pende rehe. Peẽ Israelgua, aníke peñorãirõ Tupã pende ru ypykue Jára ndive! Cháke na pende pu'aka mo'ãi hese!”

13Jeroboam he'i ra'e iñorãirõhára tapykue guápe omongora haguã Judá guápe ha ondyry haguã hese kuéra hapykue guio. Upéicha rupi Jeroboam ondyrýta Judá guáre henonde guio ha hapykue guio.

14Umi Judagua oma'ẽ hapykue gotyo ha ohecha oñendyryha hese kuéra tenonde ha tapykue guio. Upérõ ohenói hikuái Ñandejárape ha pa'i kuéra ombopu ituru.

15Umi Judagua opoívo yvytúre isapukái guasu ñorãirõmegua, Tupã ondyry Jeroboam ha opa Israel guáre, ha omboguevi chupe kuéra Abiam ha Judá renondégui.

16Umi Israelgua okañy Judá guágui, Tupã omoĩ haguére chupe kuéra Judagua pópe.

17Abiam ha iñorãirõha kuéra ojuka heta etereípe. Pe árape omano 500.000 ñorãirõha poravopyre Israelgua.

18Upérõ umi Israelgua oñemona yvýre, Judagua katu ijyvytu hese kuéra ojerovia haguére Tupã itúva kuéra ypykue Járare.

19Abiam omuña Jeroboámpe ha oipe'a chugui táva kuéra Betel, Jesana ha Efraín ha umi tava'i kuéra hesegua.

20Jeroboam ndaikatuvéi oñakã rapu'ã oikove aja Abiam. Ipahápe Ñandejára oinupã rasy chupe ha Jeroboam omano.

21Upe aja Abiam oñemombarete iguapyhápe. Hembireko 14, ita'ýra 22 ha itajýra 16.

22Abiam rekovekue ha opa mba'e ojapo vaekue oikove aja, ojehai maranduhára*f** Iddo kuatiápe.

Asá oisãmbyhy Judápe(1 R 15.8-12)

23Abiam omano rire oñeñotỹ David távape. Upéi oisãmbyhy hendaguépe ita'ýra Asá. Ha'e oisãmbyhy aja, oĩ py'a guapy upe tetãme 10 áño pukukue.