Jueces 14 - Biblia Guaraní

Sansón omenda ramo guare

1Peteĩ jey Sansón oho táva Timnat ha upépe hesaho peteĩ kuña filistéo kuéravare.

2Ojevývo hógape he'i túva kuérape:

—Ajuhu peteĩ kuña Timnátpe filistéo kuérava. Aipota upéva pehecha chéve che rembirekorã.

3Túva ha sy katu he'i chupe:

—Ndaipóri piko ñane rehegua kuéra apytépe kuña ajeve reipota filistéo kuérava ne rembirekorã? Umíva niko ndojeroviái Tupã rehe.

Sansón katu he'i chupe kuéra:

—Upéva upe kuñánte aipota che rembirekorã, ha aipota upéva pehecha chéve.

4Túva ha sy ndoikuaái ko'ã mba'e upéicha ojehuha Tupã upéicha oipotágui. Umíva umi árape niko Israel ñemoñare oĩ filistéo kuéra po guýpe, ha Tupã oheka mba'éichapa oñorãirõvo hendive kuéra.

5Upéi oho Sansón, túva ha sy ndive Timnátpe. Oguahẽvo parralty oĩva upe táva jerére, upégui osẽ okororõ chupe peteĩ león ra'y rusu.

6Tupã pu'aka omombarete Sansónpe. Ha ipo nandípe ojuka upe león ra'y rusu kavara ra'y ojuka ramo guáicha. Túva ha sýpe katu mba'evete nde'íri.

7Oguahẽ upe kuña iñakã vaívare rógape ha oñe'ẽ chupe.

8Nda aréi ete rire, oúvoma omenda haguãicha upe kuñáre, opia upe tapégui ohecha jey haguã upe león re'õngue oheja vaekue. Ojuhu káva ojaitypo hague hyepýpe ha ijeiraha.

9Oguenohẽ ipópe ha ho'u ohóvo tapére. Ohupytývo túva kuérape, ome'ẽ avei chupe kuéra ha umíva ho'u avei. Sansón nomombe'úi chupe kuéra oguenohẽ hague upe león re'õngue retepýgui.

10Túva oho oguahẽ upe kuña rógape. Sansón ojapo peteĩ karu guasu, ojapoháicha mitã rusu kuéra umíva umi árape.

11Filistéo kuéra ohechávo upéva, omondo hikuái 30 mitã rusu oĩ haguã hendive.

12Ko'ãvape Sansón he'i:

—Areko peteĩ mba'e aporanduséva peẽme jahecha peikuaápa. Ágã 7 ára haguépe, ko karu guasu opa vove, peje ramo chéve mba'épa hína upe aporandúva peẽme ame'ẽta peẽme peteĩ-teĩ pende ahojarã ha pende ao areterã.

13Ndapeikuaái ramo katu peẽ peme'ẽta chéve peteĩ-teĩ che ahoja ha che aorã.

He'i chupe hikuái:

—Eporandu katu oréve. Rojapysaka hína nde rehe.

14He'i chupe kuéra Sansón:

Hapicha ro'o ho'úvagui osẽ ja'úva

ha imbaretévagui osẽ he'ẽva.

Mbohapy ára ohasa rire ndoikuaái gueteri hikuái upe Sansón oporandúva chupe kuéra.

15Upe irundy arahápe katu he'i Sansón rembirekópe hikuái:

—Ere ne ménape te'i oréve mba'épa hína upe oporandu vaekue oréve. Cháke nereporandúi ramo, rombojáta tata nde ru rógare pende reheve ipype. Taiko ore gueru ápe peipe'apa haguã ore hegui roguerekomíva?

16Sansón rembireko oho iména rendápe ha tasẽme he'i chupe:

—Nde niko nda che rayhúi ajeve ndeeréi chéve mba'épa upe reporandu vaekue umi che retã guápe.

He'i chupe iména:

—Che ru ha che sýpe namombe'úi, ha piko ndéve amombe'úta?

17Upe kuña katu hasẽ iménape upe karu guasu aja pukukue. Upe 7 arahápe katu, omongueráiguima chupe, omombe'u hembirekópe ha kóva oho omombe'u hetã guápe.

18Upe 7 arahápe kuarahy oike mboyve oñemboja Sansón rendápe umi filistéo kuéra ha he'i chupe:

—Mba'épa oĩ he'ẽvéva eíragui,

ha mba'épa imbareteve leóngui?

Ha he'i chupe kuéra Sansón:

—Ndapejetypekái rire che kokuépe,

ndapeikuaái vaerã mo'ã upe aporandúva peẽme.

19Ha Tupã pu'aka omombarete Sansónpe, ha osẽ oho Ascalónpe ha ojuka 30 kuimba'e upépe guápe. Ha umi ojuka vaekuégui oipe'a ijao ha ogueraha ome'ẽ umi oikuaa vaekuépe imba'e porandu. Pochýpe osẽ upégui ha oho túva rógape.

20Upe kuña katu oñeme'ẽ Sansón irũ peteĩme hembirekorã.