Zvirevo 10 - Shona Bible 1949, revised 2002（SNA2002）

Zvirevo pamusoro pezvinhu zvizhinji

1Zvirevo zvaSoromoni.

Mwanakomana, akachenjera,

anofadza baba;

Asi mwanakomana benzi anoshuwisa mai vake.

2Pfuma yakawanikwa nezvakaipa haibatsiri chinhu;

Asi kururama kunorwira parufu.

3Jehovha haangatenderi mweya wowakarurama kuti

unzwe nzara;

Asi kupanga kwavakaipa unokusundira kure.

4Anobata noruoko rusine hanya,

achava murombo;

Asi ruoko rweasina usimbe runopfumisa.

5Anounganidza muzhezha, ndiye

mwanakomana wakachenjera;

Asi anovata hope mukukohwa,

mwanakomana anonyadzisa.

6Mikomborero iri pamusoro wowakarurama;

Asi muromo wowakaipa unovanza kumanikidza.

7Kuyeukwa kwowakarurama kunovigira kuropafadzwa,

Asi zita rowakaipa richaora.

8Ane mwoyo wakachenjera, achagamuchira mirairo;

Asi ane miromo youpenzi achawisirwa pasi.

9Anofamba zvakarurama, anofamba zvakasimba;

Asi anominamisa nzira dzake, achazikanwa.

10Anochonya neziso rake, anouyisa madambudzo;

Asi ane miromo youpenzi, achawisirwa pasi.

11Muromo wowakarurama itsime roupenyu;

Asi muromo wowakaipa unovanza kumanikidza.

12Mbengo dzinomutsa kukakavara;

Asi rudo runofukidza kudarika kwose.

13Pamiromo yeane njere panowanikwa uchenjeri;

Asi shamhu yakafanira musana woanoshaiwa njere.

14Vakachenjera vanozvichengetera zivo;

Asi muromo webenzi uri pedyo nokuparadzwa.

15Pfuma yomupfumi ndiro guta rake rakasimba;

Zvinoparadza varombo ndihwo urombo hwavo.

16Zvaakabatira zvinoisa wakarurama kuupenyu;

Zvakawanikwa nowakaipa zvinoisa kuzvivi.

17Anoterera kurairirwa, ari panzira youpenyu;

Asi anoramba kurairwa, anotsausa vamwe.

18Anovanza kuvenga, ane miromo yenhema;

Ana makuhwa, ibenzi.

19Kudarika hakungakoni pamunhu ana

mashoko mazhinji;

Asi anodzora miromo yake, ano huchenjeri.

20Rurimi rwowakarurama rwakafanana

nesirivha yakasarurwa;

Mwoyo wowakaipa haubatsiri chinhu.

21Miromo yowakarurama inosimbisa vazhinji;

Asi mapenzi anofa nokushaiwa zivo.

22Kuropafadza kwaJehovha ndiko kunopfumisa;

Kutambura pabasa hakuwedzeri chinhu.

23Benzi rinoti kuita zvakaipa kutamba;

Ndizvo zvinoitawo uchenjeri kuno ane njere.

24Zvinotyiwa nowakaipa, ndizvo zvichamuwira;

Asi wakarurama achapiwa zvaanoda.

25Kana chamupupuri chapfuura, wakaipa haachipo;

Asi wakarurama ane nheyo dzisingaperi.

26Sezvinoita vhininga pameno, noutsi pameso,

Ndizvo zvakaita simbe kuna vanomutuma.

27Kutya Jehovha kunowedzera mazuva;

Asi makore owakaipa achatapudzwa.

28Tariro yavakarurama mufaro;

Asi kutarira kwavakaipa kuchaparadzwa.

29Nzira yaJehovha inhare kunowakarurama;

Asi ndiko kuparadzwa kuna vanoita zvakaipa.

30Wakarurama haangatongozununguswi nokusingaperi;

Asi vakaipa havangarambi vagere panyika.

31Muromo wowakarurama unobudisa uchenjeri;

Asi rurimi rune nhema ruchabviswa.

32Miromo yowakarurama inoziva zvinofadza;

Asi muromo wowakaipa unotaura zvine nhema.