Mapisarema 87 - Shona Bible 1949, revised 2002（SNA2002）

Mbiri yeZioniPisarema ravanakomana vaKora; rwiyo.

1Nheyo dzake dziri pamakomo matsvene.

2Jehovha anoda masuo eZioni

Kupfuura pose panogara Jakobho.

3Zvinhu zvakanakisa zvinotaurwa pamusoro pako,

Iwe guta raMwari.

4Rahabhi neBhabhironi ndichati vari

pakati pavanondiziva;

“Tarirai, Firisitia, neTire, neItiopia;

Munhu uyu akazvarirwako.”

5Zvirokwazvo, pamusoro peZioni vachati,

“Uyu nouyo vakazvarirwamo;

Naiye Wokumusorosoro amene acharisimbisa.”

6Jehovha achaverenga, pakunyora

kwake ndudzi, achiti,

“Munhu uyu akazvarirwako.”

7Vanoimba navanotamba, vachati,

“Matsime angu ose ari mauri.”