1 Timote 3 - Mukanda wa Nzambi Dihungila Dikulukulu ne Dihungila Dihia-dihia 2003（TSH）

Bakulu ne batanu ba bintu

1Dî edi didi mua kueyemenyibua ne, Biasua muntu kuangata mudimu wa mukulu-mutangidi, yeye udi usua mudimu muimpe.

2Nunku budi mukulu-mutangidi nʼabu mbua kuikala kai ne bilumbu; ikale biandi muena mukashi umue; ikale biandi muena meshi mahola ne buhuekele; amanye mua kulongolola malu andi bimpe; ikale musankididi wa benyi; ikale muakane wa kuyisha bakuabo.

3Kikadi ne diyoyo bua malulu; kikadi mukumianganyi ne bakuabo; kadi ikale muena buhele; kasu biandi mayoyo; kateki mutshima wandi ku biuma.

4Akokeshe ba mu nsubu wandi bimpe, ikale ne bana bamukokela bimpe ne buneme buongo.

5Kadi bikala muntu kai mumanye mua kukokesha ba mu nsubu wandi, nealame ekelesia wa Nzambi munyi?

6Kikadi biandi muntu muhia-muhia mu bualu bua Nzambi; anyi hadisueye, neahone mu dilumbuluishibua dia diabolo.

7Bualu bukuabo, budiye nʼabu mbua kuikala ne lumu luimpe kudi badi kabai munkatshi mua bena ditabusha; bua kahonyi biandi mu malu adi avuisha bihendu ne mu buteyi bua diabolo.

8Muomumue balami ba bintu bikale ne kanemu; kabikadi ne mei abidi; kabadidi ku maluvu a bungi; kabakumi mitshima yabo ku biuma bidi bifume ku nshila mibi;

9balame bualu busokoka bua ditabusha mu muoyo-mukese mutoke.

10Badianjile kubateta bobo aba kabidi, hashishe benze mudimu wa balami, bikalabo kabai mua kubandibua.

11Muomumue bakashi bikale ne kanemu, kabikadi bena bunsonge; bikale ne meshi mahole ne mua kueyemenyibua mu malu onso.

12Balami ba bintu bikale bena mukashi umue, bakokeshe bana babo ne ba mu nsubu yabo bimpe,

13bualu bua bobo bakenza mudimu bimpe bu balami badi badiangatshila muaba mubandila ne dikima dikole mu ditabusha dia mu Kilisto Yesu. Butumbi bua Kilisto mu ekelesia

14Ndi nkufundila malu â handi ntekemena bua kulua kûdi tshituha tshihi;

15kadi binashala musangu mule, udi nkufundila mukanda eu bua wewe umanye bu mudibo ne bua kuenza mu nsubu wa Nzambi, udi muaba wa tshijila wa ekelesia wa Nzambi udi ne muoyo, udi bu dikunshi ne tshishindamenu bia malu malelela.

16Ne kakuena mpata ya bunene bua bualu busokoka bua buimpe bua Nzambi:

Nyeye wakamueneshibua mu mubidi wa muntu,

Wakabingishibua mu nyuma,

Wakamuenebua kudi banjelo,

Wakambibua munkatshi mua bisamba bia bende,

Wakitabushibua ha buloba,

Wakangatshibua mulu ne butumbi.