Misambu 61 - Mukanda wa Nzambi Dihungila Dikulukulu ne Dihungila Dihia-dihia 2003（TSH）

Badi Batekemena Bulami bua Nzambi

1Wewe Nzambi, unvua muadi wanyi,

teleja matshu ku kulomba kuanyi.

2Kunfudilu kua buloba ndi nkuela dî dianyi,

bahanga mutshima wanyi.

Undombele ku dibue didi dintamba kulu

3bualu bua wewe udi tshinyemenu tshianyi, udi tshibunda tshikole ku

mpala kua badi nʼanyi lukuna.

4Witabushe bua meme nshikame bianyi tshiendelele mu nsubu webe wa ntenta;

bua meme mpete tshinyemenu mu dibuikila dia mahuahua ebe.

5Bualu bua wewe, Nzambi, wakunvua mitshihu yanyi,

wakumpa buhianyi bua badi banemeka dina diebe.

6Nealeheshele mukelenge matuku a muoyo wandi;

bidimu biandi nebivulangane bikondo bia bungi.

7Neashikame biandi mu nkuasa wandi wa bukelenge tshiendelele ku mpala kua Nzambi;

Wambile luse lujalame ne lulamatu lua bushuwa dî bimulame.

8Nunku nengimbe misambu ya kutumbisha nʼai dina diebe tshiendelele,

handi mmana mitshihu yanyi ku dituku ne ku dituku.