1 Kulondolola 14 - Mukanda wa Nzambi Dihungila Dikulukulu ne Dihungila Dihia-dihia 2003（TSH）

Hilama Udi Wanyisha Davidi(2 Sam. 5.11-12)

1Hilama, mukelenge wa Tulo, wakatuma ba-messager kudi Davidi, ne mitshi ya cèdre ne bena tushola ne bena mabaya bua kumuashilabo nsubu.

2Davidi wakamanya ne, Nzambi wakunjadika mukelenge ku mutu kua Bena Isalele; bualu bua bukelenge buandi buakadi bubandishibue kulu bua bantu bandi Bena Isalele.

Bana ba Davidi Bakalelabo ku Yelushalema(2 Sam. 5.13-16; 1 Kul. 3.5-9)

3Davidi wakabaka bakashi bakuabo mu Yelushalema; Davidi wakalela bana ba balume ne bana ba bakashi bakuabo.

4Aba mbana bakaleleye mu Yelushalema: Shamua ne Shobaba ne Natana ne Solomo

5ne Yibehâ ne Elishua ne Elepeleta

6ne Noga ne Nefege ne Yafia

7ne Elishama ne Bêleyada ne Elifelete.

Davidi Udi Utamba Bena Peleshete Bukole(2 Sam. 5.17-25)

8Hakunvua Bena Peleshete lumu ne, Bakuela Davidi manyi ha mutu bua kuikaleye mukelenge wa Bena balele bonso, Bena Peleshete bonso nakaya kukeba Davidi; hakunvua Davidi lumu elu, yeye wakaya bua kuluangana nʼabo.

9Bena Peleshete hakamana kuhaula misoko ya mu tshibanda tshia Bena Lefa.

10Davidi wakebesha Nzambi ne, Nye bua kuluangana ne Bena Peleshete, anyi? Wewe neubafile mu tshianza tshianyi, anyi? Yehowa wakamuambila ne, Uye biebe, bualu bua meme nembafile mu tshianza

11Nunku bobo bakafika ku Bâla-pelasima; Davidi wakabashihelaku. Davidi wakamba ne, Nzambi wakahatuka kudi bena lukuna banyi bu mudi mai ahatuka. Nunku badi babikila muaba au ne, Bâla-pelasima.

12Bakashiyaku mpingu yabo; Davidi wakela mukenji wandi, bakayosha ne kahia.

13Bena Peleshete wakahaula misoko ya mu tshibanda kabidi.

14Davidi wakebesha Nzambi kabidi; Nzambi wakamuambila ne, Kuyi, kubalondi; usesuke kudibo, yila kudibo ku luseke lua mitshi ya mûrier.

15Hashishe haunvua tshiona mu mitu ya mitshi ya mûrier, uluangane nʼabo; bualu bua Nzambi wakadianjila ku mpala kuebe bua kushiheye musumba wa Bena Peleshete.

16Davidi Wakenza muakamuambila Nzambi; bakashiha musumba wa Bena Peleshete ku Gibeona tô ne ku Gezê.

17Lumu lua Davidi tuakamuangalaka ku maloba onso; Yehowa wakavuisha ba mu bisamba bionso ditshina bua bualu buandi.