Yobo 7 - Mukanda wa Nzambi Dihungila Dikulukulu ne Dihungila Dihia-dihia 2003（TSH）

Yobo Udi Ukonka Nzambi

1Muntu kena ne tshikondo tshia kuenzeye mudimu mukole hanshi ha buloba, anyi?

Matuku andi kaena bu a muena mudimu wa difutu, anyi?

2Bu mudi muhika ujinga mundidimbi wa dihueka dia diba,

bu mudi muena mudimu wa difutu windila difutu diandi,

3nunku badi bampesha ngondo idi anu ne malu a hatuhu,

badi bakunguila mafuku adi ne ntatu.

4Hanalala hanshi, ndi ndikonka ne,

Nembike diba kai, nsangana butuku bumane kutshia?

Ndi nsumpakana eku ne eku tô ne hatshia butuku.

5Bikusu ne mabuwa a buloba bidi hamʼbidi hanyi bonso;

dikoba dianyi didi dihandika, dihatuka mai.

6Matuku anyi adi ahita mundongo wa mukumi wa bilulu kuenda lubilu,

adi afika kunshikidilu kuau tshiyi ne ditekemena.

7Nzambi, uvuluke biebe ne muoyo wanyi udi anu muhuya,

disu dianyi kadiena dimona diakalengele kabidi

8Disu dia udi untangila kadiena dintangila kabidi,

mesu ebe neikale kundi, meme tshitshiyihu.

9Bu mudi ditutu ditangadika ne dijimina,

nunku muntu wahueka mu Muaba wa Bafue kena uhingana kabidi,

10kena uhingana kabidi mu nsubu muandi,

ba ku muaba wakadiye ushikama diambedi kabena bamumona kabidi.

11Meme kabidi tshiena mbuikila mukana muanyi;

nengambe di ne kanyinganyinga ka mutshima wanyi;

nentontolole bua ntatu ya mu muoyo wanyi.

12Ndi mai manene anyi nyama wa mu mai manene

bua wewe udi uteka mutentekedi bua kuntentekela, anyi?

13Hangamba bianyi ne, Bulalu buanyi nebunsambe,

ditanda dianyi dia kulala nediholeshe meji adi annyingalasha;

14wewe udi untshinyisha ne bilota,

udi unkuatshisha buowa bukole ne bikena kumona.

15Nunku mutshima wanyi udi utamba kusungula bua kunfiekelabo mu nshingu;

ndi nsungula lufu ku mpala kua makenga anyi.

16Muoyo wanyi udi untonda! Tshiena musue kuikala ne muoyo tshiendelele.

Undekele, bualu bua matuku anyi adi anu bu muhuya.

17Muntu udi tshinyi, bua wewe udi umutumbisha,

ne bua wewe udi uteka mutshima webe kudiye;

18bua wewe udi ulua kumutangila ku dinda ku dinda,

ne udi umuteta meba onso?

19Musangu neulehe bule munyi wewe kuyi muanji kumusha mesu ebe kundi?

Neundekele musangu bule munyi bua meme kumina mate anyi?

20Bingikala muenze bibi, ndi mua kukuenzela tshinyi,

wewe, mulami wa bantu?

Bualu kai wewe wakunteka bu tshimanyinu tshia kuasaku mikete yebe,

tô ne hakalua bualu ebu bujitu kundi?

21Wewe kuena umbuikidila bubi buanyi,

kuena ungumusha malu mabi anyi bua tshinyi?

Bualu bua mpindiu nendale hanshi mu dinfuenkenya,

ne wewe neunkebe ne disuminyina, kadi tshiena ngikalaku.