Mga Hebreohanon 1 - Cebuano Contemporary Bible

Ang Pulong sa Dios Pinaagi sa Iyang Anak

1Kaniadto, daghang higayon nga misulti ang Dios ngadto sa atong mga katigulangan pinaagi sa mga propeta ug sa nagkalain-lain nga pamaagi.

2Apan niining ulahing mga adlaw, nakigsulti siya kanato pinaagi sa iyang Anak. Pinaagi kaniya, gimugna sa Dios ang tibuok kalibotan ug siya usab ang iyang gipili nga manag-iya sa tanan.

3Diha kaniya makita ang nagsidlak nga gahom sa Dios, ug kon unsa ang Dios mao usab siya. Siya mao ang nagbuot sa tanang mga butang sa tibuok kalibotan pinaagi sa iyang gamhanan nga pulong. Sa dihang nahinloan niya kita sa atong mga sala, milingkod siya sa tuong dapit aron magdumala kauban ang Dios.

4Busa mas gamhanan ang Anak sa Dios ug mas halangdon ang iyang ngalan kaysa mga anghel.

Ang Anak sa Dios Labaw kaysa mga Anghel

5Kay wala gayoy anghel nga giingnan sa Dios nga,

“Ikaw ang akong Anak,

ug karon ipaila ko nga ako ang imong Amahan.”

Ug wala usab moingon ang Dios bahin kang bisan kinsa nga anghel nga,

“Ako mahimong iyang Amahan,

ug siya mahimong akong Anak.”

6Ug sa dihang ipadala na sa Dios ang iyang bugtong nga Anak dinhi sa kalibotan miingon siya,

“Ang tanang mga anghel sa Dios kinahanglan mosimba kaniya.”

7Mao kini ang giingon sa Dios bahin sa mga anghel,

“Ang mga anghel akong mga sulugoon,

ug mahimo ko silang buhaton

nga sama sa hangin o sama sa kalayo nga nagdilaab.”

8Apan ngadto sa iyang Anak, nag-ingon siya,

“Ang imong gingharian, O Dios, wala gayoy kataposan,

ug matarong ang imong pagdumala niini.

9Nalipay ikaw sa mga buhat nga matarong,

apan gikaligutgotan mo ang mga buhat nga daotan.

Busa gipili ka sa Dios, nga imong Dios,

ug gihatagan kag kalipay

nga labaw pa kaysa gihatag niya sa imong mga kauban.”

10Ug midugang siya pag-ingon ngadto sa iyang Anak,

“Ikaw, Ginoo, mao ang nagmugna sa kalibotan,

ug ang tanan nga ania niini gibuhat usab

sa imong mga kamot.

11Kining tanan mahanaw, apan ikaw magpadayon sa gihapon.

Ang tanan madunot sama sa mga bisti.

12Ug sama usab sa mga bisti,

pil-on mo kining tanan ug imo dayong ilisdan.

Apan ikaw magpabilin nga mao gihapon,

dili mausab hangtod sa kahangtoran.”

13Bisan kanus-a, wala gayoy anghel nga giingnan sa Dios nga,

“Lingkod dinhi dapit sa akong tuo,

hangtod mapailalom ko kanimo ang imong mga kaaway.”

14Dili ba nga ang mga anghel mga espiritu lang nga gisugo sa Dios nga motabang sa mga tawo nga iyang luwason?