Numeros 34 - Cebuano Contemporary Bible

Ang mga Utlanan sa Canaan

1Miingon ang Ginoo kang Moises,

2“Ingna ang mga Israelinhon nga kon mosulod na sila sa Canaan, mao kini ang mga utlanan sa yuta nga ilang mahimong panulondon:

3“Ang utlanan sa habagatan mao ang kamingawan sa Zin, subay sa Edom ug paingon sa sidlakan ngadto sa Patay nga Dagat,

4dayong liko pahabagatan paingon sa Tungasanan sa Akrabim, hangtod sa kamingawan sa Zin, ug hangtod sa habagatan sa Kadesh Barnea. Unya modiretso kini sa Hazar Adar hangtod sa Azmon,

5gikan sa Azmon dayong liko padulong sa Walog sa Ehipto, ug sangko sa Dagat sa Mediteraneo.

6“Ang utlanan sa kasadpan mao ang Dagat sa Mediteraneo.

7“Ang utlanan sa amihan magsugod sa Dagat sa Mediteraneo paingon sa Bukid sa Hor,

8ug gikan sa Bukid sa Hor mopaingon kini sa Lebo Hamat lapos sa Zedad

9ug sa Zifron, ug mosangko sa Hazar Enan.

10“Ang utlanan sa sidlakan magsugod sa Hazar Enan paingon sa Shefam,

11dayong lugsong paingon sa Ribla, sa sidlakang bahin sa Ain, unya lahos sa mga pangpang sa may sidlakang bahin sa Linaw sa Galilea.

12Unya palugsong kini ngadto sa Jordan sangko sa Patay nga Dagat. Mao kini ang inyong yuta ug ang mga utlanan niini.”

13Unya miingon si Moises sa mga Israelinhon, “Bahinon ninyo kini nga yuta ingon nga inyong panulondon pinaagi sa hulbot-hulbot. Miingon ang Ginoo nga ihatag kini ngadto sa siyam ug tunga ka tribo,

14-15kay ang tribo ni Ruben, ni Gad, ug ang katunga sa tribo ni Manases nakadawat na man sa ilang panulondon sa sidlakang bahin sa Jordan atbang sa Jerico.”

16Miingon ang Ginoo kang Moises,

17“Si Eleazar nga pari ug si Josue nga anak ni Nun mao ang magbahin sa yuta alang sa mga tawo.

18Unya pagpili ug usa ka pangulo gikan sa matag tribo sa pagtabang kanila sa pagbahin sa yuta.

19“Mao kini ang mga ngalan sa mga gipangpili:

“Pangulo gikan sa tribo sa Juda

si Caleb nga anak ni Jefune;

20gikan sa tribo ni Simeon

si Shemuel nga anak ni Amihud;

21gikan sa tribo ni Benjamin

si Elidad nga anak ni Kislon;

22gikan sa tribo ni Dan,

gipangulohan ni Buki nga anak ni Jogli;

23gikan sa tribo Manases nga anak ni Jose,

gipangulohan ni Haniel nga anak ni Efod;

24gikan sa tribo Efraim nga anak ni Jose,

gipangulohan ni Kemuel nga anak ni Shiftan;

25gikan sa tribo Zabulon,

gipangulohan ni Elizafan nga anak ni Parnac;

26gikan sa tribo ni Isacar,

gipangulohan ni Paltiel nga anak ni Azan;

27gikan sa tribo ni Aser,

gipangulohan ni Ahihud nga anak ni Shelomi;

28gikan sa tribo ni Neftali,

gipangulohan ni Pedahel nga anak ni Amihud.”

29Sila ang gisugo sa Ginoo sa pagtabang ug bahin sa yuta sa Canaan ingon nga panulondon sa mga Israelinhon.