Mga Salmo 3 - Cebuano Contemporary Bible

Salmo 3Ang awit ni David sa dihang nagpahilayo siya gikan sa iyang anak nga si Absalom.

1 Ginoo, kadaghan sa akong kaaway;

kadaghan sa nakigbatok kanako!

2Nag-ingon pa sila

nga dili kuno nimo ako luwason.

3Apan ang tinuod,

ikaw ang taming nga nagpanalipod kanako.

Gihatagan mo ako

ug kadaogan batok sa akong mga kaaway,

ug gilig-on mo ako.

4Sa dihang nagpakitabang ako kanimo, Ginoo,

imo akong gitubag didto sa imong balaang bungtod.

5Tungod kay gibantayan mo ako,

makatulog ako ug makamata nga malinawon.

6Bisan pag linibong mga kaaway ang maglibot kanako,

dili ako mahadlok.

7Sige na Ginoo nga akong Dios,

luwasa ako!

Kaniadto imong gipakaulawan

ang tanan kong mga kaaway;

imong gikuha ang ilang katakos sa paghulga kanako.

8Ikaw, Ginoo, ang nagluwas

ug nagpanalangin sa imong mga katawhan.