Isaias 21 - Cebuano Contemporary Bible

Ang Mensahe bahin sa Babilonia

1Mao kini ang mensahe bahin sa Babilonia:

Mosulong ang mga kaaway nga daw alimpulos nga mohaguros sa Negev.

Gikan kini sa kamingawan, sa makalilisang nga yuta.

2Nakita ko ang usa ka makalilisang nga panan-awon

mahitungod sa pagluib ug pagpanglaglag.

Kamong mga taga-Elam ug taga-Media,

liboti ninyo ang Babilonia ug sulonga.

Tapuson sa Dios ang pagpaantos niya

sa ubang mga nasod.

3Kining nakita ug nadunggan ko sa panan-awon,

nakapakurog gayod kanako ug naghatag ug sakit sa akong kalawasan,

sama sa sakit nga gibati sa babaye nga nagbati.

4Nagkuba-kuba ang akong dughan,

ug nagkurog ako sa kahadlok.

Dili ako makatulog panahon sa kagabhion,

kay gikulbaan gihapon ako.

5Nangandam alang sa kombira ang mga opisyal.

Nagbutang sila ug mga hapin nga ilang kalingkoran.

Nangaon sila ug nanginom,

ug sa kalit lang adunay misinggit,

“Dali, pangandam kamo alang sa gira!”

6Miingon ang  Ginoo kanako,

“Pagbutang ug tigbalantay

sa siyudad nga mosulti sa iyang makita.

7Kinahanglan nga magbantay

gayod siya pag-ayo ug magpahibalo dayon

kon makakita siyag mga sundalo nga nagsakay sa mga karwahi

nga ginaguyod sa duha ka kabayo

o ug mga sundalo

nga nagsakay sa mga asno ug mga kamelyo.”

8Misinggit ang tigbalantay,

“Sir, adlaw ug gabii akong nagbantay dinhi sa tore.

9Ug karon, tan-awa!

Adunay nagpadulong dinhi nga mga karwahi

ug mga tigkabayo nga nagparis-paris.”

Unya mipadayon ang tigbalantay,

“Napukan na gayod ang Babilonia.

Ang tanang imahen sa iyang mga dios nangadugmok

ug nagkatag sa yuta.”

10Akong mga katagilungsod nga Israelinhon,

nga daw mga trigo nga gigiok,

sultihan ko kamo sa mga butang

nga akong nadunggan gikan sa Ginoo nga Makagagahom,

ang Dios sa Israel.

Ang Mensahe bahin sa Edom

11Mao kini ang mensahe bahin sa Edom:

Adunay tawo gikan sa Seir nga nagpunay

ug pangutana kanako,

“Guwardya, dugay pa ba mabuntag?”

12Mitubag ako,

“Sa dili madugay moabot na ang kabuntagon,

apan moabot pag-usab ang kagabhion.

Kon buot kang mangutana pag-usab,

balik lang ug pangutana pag-usab.”

Ang Mensahe bahin sa Arabia

13Mao kini ang mensahe bahin sa Arabia:

Kamong mga panon sa magpapanaw

gikan sa Dedan,

nga nagkampo sa kamingawan sa Arabia,

14hatagi ninyog tubig ang mga giuhaw.

Kamong nagpuyo sa Tema,

hatagi ninyog pagkaon

ang mga tawo nga nangikyas

gikan sa ilang dapit.

15Nangagiw sila tungod sa labihan nga gira;

gigukod silag espada ug pana sa ilang mga kaaway.

16Miingon ang Ginoo kanako, “Sulod sa usa ka tuig, matapos ang pagkagamhanan sa Kedar.

17Gamay lang ang mahibilin sa iyang maisog nga mga tigpana. Mahitabo gayod kini, kay ako, ang  Ginoo nga Dios sa Israel, ang nag-ingon niini.”