Habakuk 3 - Cebuano Contemporary Bible

Ang Pag-ampo ni Habakuk

1Ang pag-ampo ni Propeta Habakuk.

2 Ginoo nadungog nako ang imong kabantugan.

Ug tungod niini nagtahod ako sa imong nahimo, Ginoo.

Himoa ug balik sa among panahon ang imong gihimo kaniadto;

sa imong kapungot hinumdomi ang kaluoy.

3Ang Dios miabot gikan sa Teman,

Ang Labing Balaan gikan sa bukid sa Paran.

Ang iyang himaya mitakob sa kalangitan

ug ang mga pagdayeg mipuno sa kalibotan.

4Ang iyang kabantugan sama sa pagsubang sa adlaw,

ang bidlisiw misidlak sa iyang mga kamot;

diin ang iyang gahum gitagoan.

5Ang katalagman niadto sa iyang atubangan;

mga peste misunod sa iyang mga lakang.

6Mibarog siya, ug nauyog ang kalibotan;

mitan-aw siya, ug mipakurog sa kanasoran sa kalibotan.

Ang karaang kabukiran nagupok,

ug ang tigulang na kaayo nga mga bungtod nangatumpag,

apan siya nagpadayon sa kahangtoran.

7Nakita ko ang mga tolda sa Kushan sa kalisod.

Ang puloy-anan sa Midian naghigwaos.

8-9Nasuko ka ba sa kasapaan, Ginoo?

Ang imo bang kapungot sa agos sa tubig?

Napungot ka ba sa kadagatan sa dihang misakay ka

sa imong mga kabayo ug sa imong mga karwahi sa kadaogan?

Imong gipadayag ang imong pana,

gitawag mo ang gapasan sa pana,

gipikas mo ang kalibotan pinaagi sa sapa.

10Ang bukid nakakita kanimo ug daw lawas nga nalubag.

Ang sulog sa tubig mibanlas kanimo;

ang kinahiladman midaguok ug miisa sa iyang balud paitaas.

11Ang adlaw ug ang bulan nagpakahilom didto sa kalangitan

sa pagkidlap sa naglupad mong mga pana,

sa pagkidlat sa nagsidlak mong mga bangkaw.

12Sa imong kapungot milatas ikaw sa kalibotan

ug sa imong kasuko gilain nimo ang kanasoran.

13Mitungha ikaw aron ipalingkawas ang imong katawhan,

aron luwason mo ang imong dinihogan.

Gidugmok nimo ang pangulo sa yuta sa kadaotan,

gihuboan mo siya gikan sa ulo ngadto sa tiil.

14Ginamit ang kaugalingong niyang bangkaw

gitusok mo ang iyang ulo.

Sa dihang ang iyang mga manggugubat misulong

aron pagpatibulaag kanamo.

Nagpanglaway ingon sa mulamoy sa makaluluoy

nga anaa sa ilang tagoanan.

15Gitunobtunoban mo ang dagat sa imong mga kabayo,

hangtod nga mibalod ang mga katubigan.

Ang Reaksyon ni Habakuk sa Gipadayag sa Ginoo

Kaniya

16Nakadungog ako ug ang kasing-kasing ko naglagubo,

ang akong mga ngabil mikurog sa tingog niini.

Kadaut miabot sa akong mga bukog,

ug ang akong mga tuhod miuyog,

Apan ako magpaabot sa adlaw sa katalagman

sa nasod nga misakop kanamo.

17Bisan kung ang kahoyng igera dili na mamulak,

ug wala nay ubas sa kaparasan,

bisan kon ang abot sa olibo mapakyas

ug ang kayutaan dili na mohatag sa iyang pagkaon,

bisan kon wala nay karnero diha sa toril,

ug wala nay baka sa iyang butanganan,

18Apan ako maglipay diha sa Ginoo,

magmalipayon ako diha sa Dios nga akong Manluluwas.

19Ang Ginoong Dios mao ang akong kusog;

gihimo niya ang akong mga tiil sama sa tiil sa lagsaw,

gisangkapan niya ako aron makayatak sa mga habog nga dapit.

Alang sa maestro sa musika. Sa akong mga instrumento nga adunay mga kuwerdas.