Mikeas 4 - Cebuano Contemporary Bible

Ang Bukid sa Ginoo

(Isa. 2:2-4)

1Sa umaabot nga mga adlaw,

ang bukid nga gitukoran sa Templo sa Ginoo mahimong

pinakaimportante sa mga bukid ug mga bungtod.

Ug modagsa niini nga bukid ang mga tawo

nga naggikan sa nagkalain-laing nasod.

2Daghang kanasoran ang muduol ug moingon,

“Dali, motungas kita sa bukid sa Ginoo,

didto sa Templo sa Dios ni Jacob.

Kay tudloan kita niya sa iyang mga pamaagi

aron matuman nato kini.”

Busa mopauli ang mga tawo gikan sa Jerusalem

dala ang mga kasugoan sa Ginoo.

3Ug pinaagi sa iyang kasugoan, husayon niya

ang mga panagbingkil sa daghang mga nasod,

bisan kadtong gamhanan nga mga nasod sa layo.

Busa dili na mag-away ang mga nasod,

ug dili na usab sila mobansay ug mga tawo alang sa pagpakig-gira.

Himuon na lang nilang punta sa mga daro

ang ilang mga espada ug himuon na lang nilang

mga sundang ang ilang mga bangkaw.

4Ang matag tawo maglingkod sa ilalom sa iyang tanom

nga ubas ug kahoy nga igos nga walay gikahadlokan.

Mahitabo gayod kini, kay ang  Ginoo nga Makagagahom

mao ang nag-ingon niini.

5Apan bisan musunod pa ang ubang mga katawhan sa ilang mga dios-dios,

kami musunod sa Ginoo nga among Dios hangtod sa kahangtoran.

Ang Plano sa Ginoo

6-7Miingon ang  Ginoo:

“Sa umaabot nga mga adlaw,

tigomon ko ang akong mga katawhan

nga akong gisilotan, ang nangapiang ug nagkatibulaag.

Himuon ko nga usa ka gamhanan

nga nasod ang mga nangahibilin kanila.

Ug maghari ako kanila sa Jerusalem

gikan niana nga panahon hangtod sa kahangtoran.

8Ang Jerusalem, nga sama sa usa ka tore nga lantawanan,

diin ang Dios magbantay sa iyang katawhan

mahimo pag-usab nga nag-unang siyudad sa Israel sama kaniadto.”

9-10Karon, ngano kamong mga lumulupyo sa Zion

nag-agulo man sama sa babaye nga nagbati?

Naa pa man ang inyong hari ug ang iyang

mga magtatambag wala man nangamatay.

Sige, paglimbag-limbag kamo sa kasakit

sama sa babayeng nagbati.

Kay sa dili madugay mobiya kamo sa inyong siyudad

ug magpuyo sa kaumahan,

ug unya dad-on kamo ngadto sa Babilonia.

Apan luwason ko kamo didto

gikan sa kamot sa inyong mga kaaway.

11Karon daghang mga nasod ang nagtigom

sa pakig-gira kaninyo.

Nag-ingon sila, “Atong pasipad-an ang Jerusalem!

Ug unya atong tan-awon ang makauulaw nga kahimtang niini.”

12Apan kini nga mga nasod

wala makahibalo sa akong huna-huna.

Wala sila makasabot sa akong plano,

nga tigomon sila aron silotan,

sama nga ang uhay tigomon aron giokon.

13Miingon ang Ginoo, “Mga lumulupyo sa Zion, lakaw kamo

ug laglaga ninyo sa hingpit ang inyong mga kaaway

nga daw sa gagiok kamo ug mga uhay.

Kay himuon ko kamong sama sa torong baka

nga adunay puthaw nga mga sungay

ug adunay bronsi nga mga kuko.

Dugmokon ninyo ang daghang mga nasod,

ug ang ilang mga bahandi nga nakuha nila

pinaagi sa kabangis ihalad ninyo kanako,

ang Ginoong makagagahom sa tibuok kalibotan.”