Exodo 25 - Cebuano Contemporary Bible

Ang mga Halad alang sa Tolda nga Pagsimbahan(Exo. 35:4-9)

1Miingon ang Ginoo kang Moises,

2“Ingna ang mga Israelinhon nga maghalad sila kanako. Ikaw mao ang modawat sa mga halad nga kinasing-kasing nilang ihalad kanako.

3“Mao kini ang mga halad nga imong dawaton gikan kanila:

“bulawan, plata, bronsi,

4hilo nga kolor ube, asul ug pula, lino,

panapton nga hinimo gikan sa balhibo sa kanding,

5panit sa laking karnero nga gitina ug pula, maayong klasi sa panit, kahoyng akasya,

6lana sa olibo alang sa suga,

mga lamas alang sa lana nga pangdihog ug alang sa humot nga insenso,

7ug bato nga onix ug uban pang mahalong mga bato nga gamiton sa efod ug sa mga bulsa-bulsa sa sapaw sa dughan.

8“Ug pahimoa ang katawhan sa Israel ug balaang puloy-anan alang kanako, diin ako magpuyo uban kanila.

9Ipahimo kini nga Tolda nga Pagsimbahan ug ang tanang kagamitan niini basi sa sumbanan nga ipakita ko kanimo.

Ang Sudlanan sa Kasugoan(Exo. 37:1-9)

10“Pagpahimo ug Sudlanan nga hinimo sa akasya nga 45 ka pulgada ang gitas-on, 27 ka pulgada ang gilapdon, ug 27 ka pulgada ang gihabugon.

11Pahaklapi kinig purong bulawan sa sulod ug sa gawas, ug paribetihi ug bulawan ang mga kilid niini.

12Pagpahimo ug upat ka bulawan nga singsing ug itaod kini sa iyang upat ka haligi.

13Unya pagpahimo ug mga pangdayong nga akasya ug pahaklapi ug bulawan.

14Isuot kini sa mga singsing sa kada kilid sa Sudlanan aron madayongan ang Sudlanan pinaagi niini.

15Dili gayod kuhaon ang mga pangdayong diha sa mga singsing sa Sudlanan.

16Unya isulod diha sa Sudlanan ang lagpad nga mga bato, diin nasulat ang Kasugoan nga ihatag ko kanimo.

17“Pahimoi ang Sudlanan ug taklob nga purong bulawan nga 45 ka pulgada ang gitas-on ug 27 ka pulgada ang gilapdon.

18-19Unya pagpahimo ug duha ka kerubin nga bulawan, ug ibutang kini sa isigka-tumoy sa tabon sa Sudlanan.

20Kinahanglan nga ang mga pako sa kerubin nagbukhad ibabaw sa tabon aron malandongan nila kini, ug mag-atbang silang duha nga nagtan-aw ngadto sa tabon.

21Isulod diha sa Sudlanan ang lagpad nga mga bato, diin nasulat ang Kasugoan nga ihatag ko kanimo, ug unya taboni ang Sudlanan.

22Makigkita ako kanimo didto taliwala sa duha ka kerubin nga anaa ibabaw sa Sudlanan sa Kasugoan, ug ihatag ko kanimo ang tanan kong mga sugo alang sa katawhan sa Israel.

Ang Lamisa(Exo. 37:10-16)

23“Pagpahimo usab ug lamisa nga akasya nga 36 ka pulgada ang gitas-on, 18 ka pulgada ang gilapdon, ug 27 ka pulgada ang gihabugon.

24Pahaklapi kinig purong bulawan ug paribetihi ug bulawan ang mga kilid niini.

25Pabutangi kinig sanipa sa kada kilid, nga upat ka pulgada ang gilapdon, ug paribetihi ug bulawan ang sanipa.

26Unya pagpahimo ug upat ka bulawan nga singsing ug itaod kini sa upat ka eskina sa may tiil sa lamisa,

27duol sa sanipa. Dinhi ninyo isuot ang mga pangdayong sa lamisa.

28Kinahanglan nga kining mga pangdayong hinimo gikan sa akasya ug hinaklapan ug bulawan.

29“Pagpahimo usab ug bulawan nga mga plato, mga tasa, mga tibod, ug mga yahong nga gamiton alang sa mga halad nga ilimnon.

30Ug kini nga lamisa kinahanglang butangan kanunay ug pan nga ginahalad sa akong presensya.

Ang Butanganan ug Suga(Exo. 37:17-24)

31“Pagpahimo usab ug butanganan sa suga nga purong bulawan ang tiil ug lawas niini, ug gidekorasyonan kinig mga bulak nga ang uban piyoos pa ug ang uban namukhad na. Unay sa butanganan sa suga ang mga dekorasyon niini.

32Ang butanganan sa suga kinahanglang adunay unom ka mga sanga, tag-tulo sa kada kilid.

33Ang kada sanga adunay tulo ka dekorasyon nga mga bulak nga ang korte murag almond, nga ang uban piyoos pa ug ang uban namukhad na.

34Ang lawas sa butanganan sa suga adunay upat ka dekorasyon nga mga bulak nga ang korte murag almond, nga ang uban piyoos pa ug ang uban namukhad na.

35Adunay usa ka bulak sa ubos sa matag bahin diin magtagbo ang mga sanga.

36Ang mga dekorasyon ug ang mga sanga unay sa lawas sa butanganan sa suga sa paghimo niini gikan sa bulawan.

37“Unya pagpahimo ug pito ka suga alang niining maong butanganan ug ipahimutang kini sa paagi nga ang kahayag niini modan-ag sa atubangan.

38Ang mga kimpit ug mga pangsalod sa naupos nga pabilo sa suga kinahanglan purong bulawan.

39Mga 35 ka kilo nga purong bulawan ang kinahanglanon mo sa pagpahimo sa butanganan sa suga ug sa tanang kagamitan niini.

40Siguroha nga ipahimo mo kining tanan sumala gayod sa plano nga gipakita ko kanimo dinhi sa bukid.