Jeremias 17 - Cebuano Contemporary Bible

Ang Sala sa Juda ug ang Silot Niini

1Miingon ang Ginoo,

“Katawhan sa Juda, ang inyong mga sala gikulit

diha sa inyong gahi nga mga kasing-kasing,

ug sa mga sungay-sungay sa mga eskina sa inyong mga halaran.

2Mao usab ang inyong mga kabataan,

nagsimba sila sa inyong mga halaran

ug sa mga poste nga simbolo sa diosa nga si Ashera

didto sa labong nga mga kahoy

ug sa taas nga mga bungtod.

3Busa ipailog ko sa inyong mga kaaway ang mga bukid sa kaumahan,

apil ang inyong mga bahandi ug mga kabtangan,

ug ang inyong mga simbahanan diha sa habog nga mga dapit,

tungod sa sala nga nahimo sa inyong tibuok nasod.

4Mawala kaninyo ang yuta nga gihatag ko kaninyo.

Ipaulipon ko kamo sa inyong mga kaaway

didto sa yuta nga wala kamo masuhito,

tungod kay gipasilaob ninyo ang akong kasuko

ug daw kalayo kini nga dili mapalong.”

5Miingon pa gayod ang  Ginoo:

“Panghimaraoton ko ang tawo nga mobiya kanako

ug mosalig sa tawo nga molig-on kaniya.

6Mahisama siya sa tanom sa kamingawan nga dili molambo.

Magpuyo siya sa mamala ug asinon nga yuta diin walay nagpuyo.

7“Apan bulahan ang tawo nga nagsalig ug naglaom kanako.

8Mahisama siya sa kahoy nga gitanom sa daplin

sa sapa kansang mga gamot nakaabot sa tubig.

Kini nga kahoy dili mahadlok ni mabalaka

kon moabot ang ting-init o taas nga hulaw.

Ang iyang mga dahon kanunayng lunhaw,

ug walay puas ang iyang pagpamunga.”

9Labihan gayod ka malimbongon ang kasing-kasing sa tawo

ug walay makatupong niini. Kinsay makatugkad niini?

10“Ako, ang  Ginoo, gasusi sa kasing-kasing ug huna-huna sa tawo.

Ihatag ko sa matag-usa ang angay sa iyang batasan ug binuhatan.”

11Ang tawo nga nakaangkon ug bahandi sa dinaotan nga paagi

sama sa langgam nga naglomlom sa itlog nga dili iya.

Sa tunga-tunga sa iyang pagkinabuhi,

mahanaw kaniya ang iyang bahandi,

ug mogawas nga buang-buang diay siya.

12O Ginoo, ang imong Templo

mao ang imong matahom nga trono sukad pa kaniadto.

13Ikaw Ginoo, ang paglaom sa Israel.

Maulawan gayod ang tanang mibiya kanimo.

Ilubong gayod sila sa yuta kay gisalikway ka nila,

ang tuboran nga naghatag ug kinabuhi.

14O Ginoo, ayoha ako ug maulian ako.

Luwasa ako ug makalingkawas ako.

Kay ikaw ang akong ginadayeg.

15Miingon ang mga tawo kanako,

“Asa na kadtong giingon sa Ginoo?

Nganong wala pa man kini mahitabo?”

16O Ginoo, wala ako magpasagad sa akong buluhaton isip magbalantay sa imong katawhan.

Wala gayod ako magtinguha nga padad-an mo silag katalagman.

Nasayod ka sa akong gipanulti.

17Ayaw akog hadloka, kay ikaw ang akong dalangpanan

sa panahon sa kalaglagan.

18Pakaulawi ug hadloka ang nagtinguha

ug daotan kanako, apan ayaw kini buhata kanako.

Padad-i silag katalagman aron mangalaglag silang tanan.

Ang Adlaw nga Igpapahulay

19Miingon ang  Ginoo kanako, “Lakaw ug tindog didto sa Ganghaan sa Katawhan diin ga-agi ang mga hari sa Juda, ug didto usab dayon sa uban pang mga ganghaan sa Jerusalem.

20Unya ingna ang mga tawo, ‘Paminawa ninyo ang mensahe sa Ginoo, kamong mga hari ug katawhan sa Juda, apil na kamong nagpuyo sa Jerusalem nga ga-agi niini nga ganghaan.

21Kini ang giingon sa Ginoo: Pagmatngon kamo kon adunay bili kaninyo ang inyong kinabuhi. Ayaw kamo pagtrabaho o pagdala sa inyong mga baligya sa ganghaan sa Jerusalem panahon sa Adlaw nga Igpapahulay.

22Oo, ayaw gayod kamo pagtrabaho o pagdalag mga butang gikan sa inyong mga balay niining adlawa. Igahin ninyo kini alang kanako sama sa gimando ko sa inyong mga katigulangan.

23Apan wala gayod sila maminaw kanako. Mga gahi silag ulo! Dili sila magpadisiplina.

24Apan kon motuman lang kamo kanako, nga dili motrabaho o modala sa inyong mga baligya diha sa mga ganghaan sa Jerusalem sa Adlaw nga Igpapahulay, ug igahin ninyo kining adlawa alang kanako,

25panalanginan ko kamo. Padayon kamo nga makabaton ug hari gikan sa kaliwatan ni David. Magsakay ang hari ug ang iyang mga opisyal sa mga karwahi ug mga kabayo ug mosulod sa mga ganghaan sa lungsod uban sa katawhan sa Jerusalem ug sa ubang bahin sa Juda. Ug kining siyudad sa Jerusalem pagapuy-an hangtod sa hangtod.

26Mangadto sa Templo sa Ginoo ang mga tawo nga naggikan sa mga dapit libot sa Jerusalem ug sa mga lungsod sa Juda ug Benjamin, ug gikan sa kabungtoran sa kasadpan, sa mga bukid, ug sa Negev. Magdala silag mga halad nga sinunog ug uban pang mga halad, sama sa halad sa pagpasidungog sa Ginoo, halad sa pagpasalamat sa Ginoo, ug mga insenso.

27Apan kon dili kamo motuman kanako, ug dili ninyo igahin alang kanako ang Adlaw nga Igpapahulay, ug kanunay kamong magdala sa inyong mga baligya diha sa mga ganghaan sa Jerusalem nianang adlawa, sunogon ko ang mga ganghaan sa Jerusalem, apil ang lig-ong mga bahin niini, ug wala gayoy makapalong sa kalayo.’ ”