Ezekiel 30 - Cebuano Contemporary Bible

Ang Pagsilot sa Ehipto

1Miingon ang  Ginoo kanako,

2“Tawo, isugilon kini nga akong mensahe ngadto sa mga taga-Ehipto. Ingna sila nga ako, ang Ginoong Dios, nag-ingon:

“Pagminatay kamo

ug hilak tungod sa umaabot ninyo nga kalaglagan.

3Kay hapit na moabot kana nga adlawa,

ang adlaw nga maghukom ang  Ginoo.

Puno sa dag-om ug mangiob kana

nga adlawa alang sa mga nasod.

4Pagasulongon ang Ehipto, ug mag-antos ang Etiopia.

Daghan ang mamatay sa Ehipto,

ug panguhaon ang mga bahandi niini, ug gun-ubon kini.

5Niini nga panag-away, mangamatay ang mga taga-Etiopia, Put, Lydia, Arabia, Libya, ug ang uban pang mga nasod nga kaabin sa Ehipto.

6“Ako, ang Ginoong Dios,

Nag-ingon nga malaglag gayod ang mga kaabin sa Ehipto,

ug mawala ang gipasigarbo niya nga gahom.

Mangamatay ang iyang mga nagpuyo gikan sa Migdol paingon sa Aswan.

7Mahimo nga labing awaaw ang Ehipto sa tanang nasod,

ug ang iyang mga lungsod mahimo nga pinakaguba sa tanang mga lungsod.

8Kon sunogon ko na ang Ehipto

ug mangamatay na ang tanang nagdapig kaniya,

mahibaloan sa iyang mga nagpuyo nga ako mao ang  Ginoo.

9“ ‘Nianang panahona, magpadala akog mga mensahero nga magsakay ug mga barko nga magpalisang sa mga taga-Etiopia nga nagpahayahay lang. Malisang gayod sila sa higayon nga laglagon ang Ehipto kay sigurado gayod nga moabot kini nga higayona.

10“ ‘Nag-ingon pa gayod ang Ginoong Dios,

“ ‘Gamiton ko si Nebucadnezar nga hari sa Babilonia

sa pagpamatay sa daghang katawhan sa Ehipto.

11Siya ug ang iyang mga sundalo,

nga mga bangis sa tanang nasod,

ipadala ko sa Ehipto sa paglaglag niini.

Sulongon nila kini, ug magkatag

ang mga patay nga lawas bisan asa.

12Pamalahon ko ang Suba sa Nilo,

ug itugyan ko ang Ehipto sa kamot sa daotan nga mga tawo.

Laglagon ko ang tibuok nga nasod sa Ehipto

ug ang tanang anaa niini pinaagi sa mga langyaw.

Ako, ang  Ginoo, ang nag-ingon niini.

13“ ‘Miingon pa gayod ang Ginoong Dios,

“ ‘Laglagon ko usab ang mga imahen sa mga dios-dios sa Memfis.

Wala nay mangulo sa Ehipto, ug pahadlokon ko

ang tanang mga nagpuyo niini.

14Himuon kong awaaw ang Patros, sunogon ko ang Zoan,

ug silotan ko ang Tebes.

15Ipatagamtam ko ang akong kasuko sa Pelusium,

ang lig-ong siyudad sa Ehipto.

Ug pamatyon ko ang daghang katawhan sa Tebes.

16Sunogon ko ang Ehipto! Mag-agulo sa kasakit ang Pelusium.

Malaglag ang Tebes, ug kanunay nga mahadlok ang Memfis.

17Mangamatay sa gubat ang batan-ong mga lalaki sa Heliopolis

ug sa Bubastis, ug ang mahibiling mga tawo

niini nga mga lungsod bihagon.

18Kon laglagon ko na ang gahom sa Ehipto,

mahimo nga ngitngit kana nga adlawa alang sa Tahpanhes.

Mawala na ang gipasigarbo nga gahom sa Ehipto.

Matabonan siya sa dag-om,

ug ang mga nagpuyo sa iyang mga lungsod bihagon.

19Ingon niana ang akong pagsilot sa Ehipto,

ug unya mahibaloan nila nga ako mao ang  Ginoo.’ ”

20Unya sa ikapito nga adlaw sa unang bulan, sa ika-11 nga tuig sa amo nga pagkabihag, miingon ang  Ginoo kanako,

21“Tawo, gibali ko ang bukton sa Paraon nga hari sa Ehipto. Wala gayod mibugkos niini aron unta mamaayo ug molig-on pagbalik aron makakupot ug espada.

22Busa ingna siya nga ako, ang Ginoong Dios, nag-ingon nga kontra ko siya. Balion ko ang duha niya ka bukton, ang maayo ug ang bali nang daan, aron mabuhian niya ang iyang espada.

23Patibulaagon ko ang mga Ehiptohanon ngadto sa nagkalain-laing mga nasod.

24Lig-onon ko ang mga bukton sa hari sa Babilonia ug pakuptan ko kaniya ang akong espada. Apan balion ko ang mga bukton sa Paraon, ug mag-agulo siya nga samaran ug himalatyon atubangan sa hari sa Babilonia.

25Lig-onon ko gayod ang mga bukton sa hari sa Babilonia, apan ang mga bukton sa Paraon mahimo nga inutil. Kon pakuptan ko na ang akong espada sa hari sa Babilonia ug iya kini nga gamiton batok sa Ehipto, mahibaloan unya sa mga Ehiptohanon nga ako mao ang  Ginoo.

26Patibulaagon ko ang mga Ehiptohanon ngadto sa nagkalain-laing mga nasod, unya mahibaloan nila nga ako mao ang  Ginoo.”