Numeros 1 - Cebuano Contemporary Bible

Ang Unang Pagsensos sa Israel

1Sa unang adlaw, sa ikaduhang bulan, sa ikaduhang tuig human mibiya ang mga Israelinhon gikan sa Ehipto, nakigsulti ang Ginoo kang Moises didto sa Tolda nga Tagboanan sa kamingawan sa Sinai. Miingon siya,

2“Esensus ninyo ang tibuok katilingban sa Israel sumala sa ilang mga tribo ug pamilya. Ilista ang mga ngalan sa tanang mga lalaki

3nga nag-edad ug 20 ka tuig pataas, nga adunay katakos sa pagpakig-gira. Kamo ni Aaron ang mangunay sa pag-ihap sa matag tribo.

4Motabang kaninyo ang matag pangulo sa matag tribo.

5“Mao kini ang mga pangulo sa matag tribo nga motabang kaninyo:

“gikan kang Ruben si Elizur nga anak ni Shedeur;

6gikan kang Simeon si Shelumiel nga anak ni Zurishadai;

7gikan kang Juda si Nashon nga anak ni Aminadab;

8gikan kang Isacar si Netanel nga anak ni Zuar;

9gikan kang Zabulon si Eliab nga anak ni Helon;

10gikan kang Efraim nga anak ni Jose si Elishama nga anak ni Amihud;

gikan kang Manases nga anak ni Jose si Gamaliel nga anak ni Pedazur;

11gikan kang Benjamin si Abidan nga anak ni Gideoni;

12gikan kang Dan si Ahiezer nga anak ni Amishadai;

13gikan kang Aser si Pagiel nga anak ni Ocran;

14gikan kang Gad si Eliasaf nga anak ni Deuel;

15gikan kang Neftali si Ahira nga anak ni Enan.”

16Mao kini sila ang mga pangulo sa matag tribo nga napili gikan sa katilingban sa Israel.

17-18Gipatigom ni Moises ug ni Aaron kauban niining mga pangulo ang tibuok katilingban niana mismong adlawa. Gipanglista nila ang tanang mga lalaki nga nag-edad ug 20 ka tuig pataas, sumala sa ilang mga tribo ug pamilya.

19Gihimo ni Moises kining pagpanglista didto sa kamingawan sa Sinai, sumala sa gisugo sa Ginoo kaniya.

20Gikan sa mga kaliwat ni Ruben, ang kamagulangang anak ni Jacob. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

21Ang gidaghanon gikan sa tribo ni Ruben kay 46,500.

22Gikan sa mga kaliwat ni Simeon. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

23Ang gidaghanon gikan sa tribo ni Simeon kay 59,300.

24Gikan sa mga kaliwat ni Gad. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

25Ang gidaghanon gikan sa tribo ni Gad kay 45,650.

26Gikan sa mga kaliwat ni Judah. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

27Ang gidaghanon gikan sa tribo ni Judah kay 74,600.

28Gikan sa mga kaliwat ni Isacar. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

29Ang gidaghanon gikan sa tribo ni Isacar kay 54,400.

30Gikan sa mga kaliwat ni Zabulon. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

31Ang gidaghanon gikan sa tribo ni Zabulon kay 57,400.

32Gikan mga kaliwat ni Efraim nga anak ni Jose. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

33Ang gidaghanon gikan sa tribo ni Efraim kay 40,500.

34Gikan sa mga kaliwat ni Manases nga anak ni Jose. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

35Ang gidaghanon gikan sa tribo ni Manases kay 32,200.

36Gikan sa mga kaliwat ni Benjamin. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

37Ang gidaghanon gikan sa tribo ni Benjamin kay 35,400.

38Gikan sa mga kaliwat ni Dan. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

39Ang gidaghanon gikan sa tribo ni Dan kay 62,700.

40Gikan sa mga kaliwat ni Aser. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

41Ang gidaghanon gikan sa tribo ni Aser kay 41,500.

42Gikan sa mga kaliwat ni Neftali. Ang tanang mga lalaki nga nag-edad ug 20 ka tuig pataas, nga adunay katakos sa pagpakig-gira, nga nalista sumala sa tribo ug pamilya.

43Ang gidaghanon gikan sa tribo ni Neftali kay 53,400.

44Mao kini ang gidaghanon sa mga lalaki nga naihap ni Moises ug ni Aaron ug sa 12 ka mga pangulo sa Israel.

45Ang kada usa kanila nalista sumala sa ilang pamilya. Nag-edad silag 20 ka tuig pataas, nga adunay katakos sa pagpakig-gira.

46Sa kinatibuk-an, mikabat ug 603,550 ang ilang gidaghanon.

47Wala i-apil niini ang mga kaliwat ni Levi.

48Kay miingon ang Ginoo kang Moises,

49“Ayaw i-apil ang tribo ni Levi sa pag-ihap uban sa mga Israelinhon.

50Ihatag kanila ang responsibilidad sa pag-atiman sa Tolda nga Pagsimbahan diin nahimutang ang Kasugoan ug ang tanang mga kagamitan niini. Sila ang modala sa Tolda ug sa tanang kagamitan niini. Kinahanglang atimanon nila ang Tolda ug magkampo sila libot niini.

51Kon ibalhin ang Tolda, sila ang mohipos niini ug mopatindog pagbalik. Si bisan kinsa nga dili kaliwat ni Levi nga moduol sa Tolda, pagapatyon.

52Magkampo ang matag tribo sa Israel sa dapit nga gitagana kanila ug magbutang ug ilang bandera.

53Apan ang mga kaliwat ni Levi kinahanglan magkampo libot sa Tolda diin nahimutang ang Kasugoan, aron dili ako masuko sa tibuok katilingban sa Israel. Ang mga kaliwat ni Levi mao ang responsable sa pag-atiman sa Tolda.”

54Gihimo sa mga Israelinhon ang tanan sumala sa gisugo sa Ginoo kang Moises.