Oseas 4 - Cebuano Contemporary Bible

Ang Akusasyon sa Ginoo

Batok sa Israel ug sa Iyang mga Pari

1Kamong mga Israelinhon nga nagpuyo sa yuta sa Israel,

pamatia ninyo kining akusasyon sa Ginoo batok kaninyo,

“Wala nay tawo sa inyong yuta nga nagmatinumanon,

naghigugma, ug nag-ila kanako.

2Ang pagpanunglo, pagpamakak, pagpatay, pagpangawat

ug pagpanapaw mao na hinuon ang inyong ginahimo.

Miabot na kini bisan asa,

ug nagsunodsunod na ang pagpinatyanay.

3Tungod niini nagmala ang inyong yuta

ug nangamatay ang tanang nagpuyo niini,

apil ang tanang klasi sa mga mananap nga naglakaw,

naglupad, ug naglangoy.

4“Apan kinahanglan walay tawong mopasangil

o moakusar ni bisan kinsa,

kay walay laing angay basulon kon dili kamong mga pari.

5Kamo ug ang mga propeta malaglag, adlaw man o gabii.

Ug laglagon ko usab ang inyong inahan.

6Nalaglag ang akong katawhan tungod

kay kulang sila sa kahibalo mahitungod kanako.

“Kay kamo mismo nga mga pari gisalikway ninyo ang kahibalo mahitungod kanako,

busa isalikway ko usab kamo isip akong mga pari.

Gikalimtan ninyo ang akong Kasugoan,

busa kalimtan ko usab ang inyong mga anak.

7Samtang nagkadaghan kamong mga pari,

misamot usab ang inyong pagpakasala batok kanako.

Busa himuon kong kaulawan ang inyong kadungganan.

8Malipay kamo nga magpakasala ang akong mga katawhan

kay makakaon man kamo sa ilang mga halad sa paghinlo.

9Nagkapareha lang kamong mga katawhan ug mga pari.

Silotan ko kamo tungod sa inyong mga daotang gawi;

balosan ko kamo sa inyong gipanghimo.

10“Nagkaon kamo, apan dili kamo mabusog.

Nagsimba kamo sa mga dios-dios

nga gituohan ninyong makahatag ug anak,

apan dili kamo manganak tungod kay gisalikway ninyo ako

11aron sa pagsimba sa mga dios-dios.

Gipanghimaraot sa Dios ang Pagsimba sa mga Dios-dios

“Mga katawhan ko, ang bag-o ug daang bino

mokuha sa inyong maayong panghuna-huna.

12Nangayo kamo ug tambag gikan sa dios-dios

nga kahoy, ug sumala ninyo, motubag kini.

Gipahisalaag kamo sa espiritu nga nagtukmod kaninyo

sa pagsimba sa mga dios-dios, busa gitalikdan ninyo ako

sama sa usa ka babayeng nagluib.

13Naghalad kamo ug nagsunog ug insenso ibabaw sa mga bukid

ug sa mga bungtod, sa ilalom sa tag-as

ug labong nga mga kahoy,

kay maayo ang ilang landong.

Busa namiga ang inyong mga anak nga babaye

ug ang inyong mga umagad nga babaye nanapaw.

14“Apan dili ko sila silotan sa ilang gihimo

kay kamo mismong mga lalaki nakighilawas man usab sa mga babayeng

nagbaligya sa ilang dungog diha sa templo,

ug naghalad pa kamo uban kanila ngadto sa ilang mga dios-dios.

Busa tungod kay wala kamoy panabot,

malaglag kamo.

15“Mga taga-Israel, bisan gitalikdan ninyo ako

sama sa usa ka babayeng maluibon,

ayaw ninyo i-angin ang mga taga-Juda.

“Ug kamong mga taga-Juda,

ayaw kamo pag-adto sa Gilgal ug sa Bet Aven

aron sa pagsimba kanako o paghimo ug panaad sa akong ngalan.

16Gahig ulo ang mga taga-Israel,

sama sila sa maidlas nga dumalagang baka.

Busa unsaon ko sila pagbantay

sama sa mga karnero sa sibsibanan?

17Nagsimba na sila sa mga dios-dios.

Pasagdi na lang sila!

18Pagkahuman nila ug inom,

magpatuyang sila sa pagpakighilawas.

Ang ilang mga tigdumala gusto kaayong mohimo

sa makauulaw nga mga binuhatan.

19Laglagon gayod sila nga daw gipalid sa makusog nga hangin,

ug maulawan sila tungod sa ilang mga halad ngadto sa mga dios-dios.”