Amos 3 - Cebuano Contemporary Bible

1Kamong mga taga-Israel, kansang mga katigulangan gipagawas ko gikan sa Ehipto, pamatia ninyo kining giingon ko batok kaninyo:

2“Sa tanang mga katawhan sa tibuok kalibotan

kamo lang gayod ang akong gipili

nga mahimong akong katawhan.

Busa silotan ko kamo tungod

sa tanan ninyong mga sala.”

Gitugot sa Dios ang Buluhaton sa mga Propeta

3Magkuyog ba ang duha ka tawo sa pagpanglakaw

kon wala sila magsabot?

4Mongulob ba ang liyon sa lasang

kon wala siyay tukbonon?

Ug mongulob ba siya sa iyang tago-anan

kon wala siyay nadakpan?

5Malit-agan ba ang langgam

kon wala butangi ug paon ang lit-ag?

Mowitik ba ang lit-ag kon wala kini nalit-agan?

6Dili ba mangurog sa kahadlok ang mga tawo

kon patingogon na ang budyong

sa pagpahibalo nga adunay mga kaaway nga misulong?

Kon moabot ang kalamidad sa usa ka siyudad,

dili ba ang  Ginoo mao ang nagpadala niini?

7Sa pagkatinuod, dili mohimo ang Ginoong Dios

ug bisan unsa kon dili una niya kini ikapadayag

sa iyang mga alagad nga propeta.

8Kinsay dili mahadlok kon mongulob na ang liyon?

Kinsa ba ang dili makapadayag sa mensahe sa Ginoong Dios

kon siya na mismo ang magpadayag sa imoha?

9Sultihi ninyo ang mga pangulo nga nagpuyo

diha sa lig-ong mga bahin sa Ashdod ug sa Ehipto

nga magtigom didto sa mga bungtod sa Samaria

ug tan-awon nila ang labihan nga kagubot

ug ang mga pagpangdaog-daog

nga nahitabo niana nga lungsod.

10“Dili sila kahibalong mobuhat ug matarong,

ug ang lig-ong mga bahin sa ilang lungsod puno

sa mga butang nga kinawat ug inilog,” miingon ang Ginoo.

11Busa mao kini ang giingon sa Ginoong Dios batok sa Samaria,

“Sulongon kamo sa mga kaaway,

ug gub-on nila ang inyong mga depensa.

Kuhaon nila ang mga kabtangan diha sa lig-ong

mga bahin sa inyong lungsod.”

12Midugang pagsulti ang  Ginoo,

“Maingon nga luwason sa magbalantay ang duha ka tiil

o usa ka dalunggan sa mananap nga gikaon sa liyon,

salbaron usab ang mga Israelinhon nga nagpuyo sa Samaria.

Apan wala silay madala gawas sa mga putol

nga bahin sa ilang mga lantay ug katre.”

13Mipadayon pag-ingon ang Ginoong Dios, ang Dios nga Makagagahom, “Pamatia ninyo kining akong isulti ug isugilon ninyo kini sa mga kaliwat ni Jacob.

14“Sa adlaw nga silotan ko ang mga taga-Israel tungod sa ilang mga sala,

gub-on ko ang mga halaran sa Betel.

Mangaputol ang mga sungay-sungay sa mga eskina sa halaran

ug mangahulog kini sa yuta.

15Gub-on ko ang ilang mga balay nga para sa tingtugnaw

ug mga balay nga para sa ting-init.

Gub-on ko usab ang ilang mahalong mga balay.

Busa daghan sa ilang mga balay ang mangaguba.

Ako, ang  Ginoo, ang nag-ingon niini.”