APOCALIPSIS 20 - Nuevo Testamento en Quichua Cañar 1996

Huaranga huatacunamanta

1Chai q'uipaca jahua pachamanta shuc ángel urai shamucuctami ricurcani. Paica ucu pacha jutcuta llavina llavetami jatun cadenandic paipac maquipi charicurca.

2Chai angelmi chai dragón nishca ñaupa rucu culebrataca huatarca. Paillatacmi diablo nishcapish, Satanás*f** nishcapish can. Chaitami huaranga huatapac cadenahuan huatarca.

3Chashna huatashpaca, ucu pacha jutcuman shitashpami punguta huichcashpa, unanchishpa churarca. Chaitaca huaranga huatacuna tucungacamanmi, gentecunata ama crichichun chashnaca ruhuarca. Chai q'uipaca ashacaman cacharishcami canga.

4Chai q'uipaca mandashpa tiyarinacunapi taripanata chasquiccuna tiyacuctami ricurcani. Shinallatac Taita Diosmantapish, Jesucristomantapish huillashpa mana cungashpa c'atishcamanta, cungata p'itishpa huañuchishca almacunatapish ricurcanimi. Paicunaca chai manchana animaltapish, paiman ricchata ruhuashcatapish mana alli nircacunachu. Shinallatac chai manchana animalpac shutita frentepi cashpa, maquipi cashpa churachunca, paicunaca mana saquircacunachu. Paicunaca cutin causarishpami, huaranga huatata Cristohuan mandarcacuna.

5Paicunami punta causariccunaca carca. Shina cacpipish chaishuc huañushcacunaca chai huaranga huatacuna pactangacamanca mana causarircacunachu.

6Maijanpish chai punta causarinapi causariccunamanca, ¡mai cushicuimi canga! Paicunaca Diospaclla cac acllashcacunami canga. Q'uipa huañuica imata paicunataca mana ruhuangachu, ashtahuanpish paicunaca Diospactapish, Cristopactapish ruhuac curacunami canga. Shinallatac paicunami Cristohuanca huaranga huatata mandangacuna.

Diablota chingachinamanta

7Huaranga huata q'uipamanca Satanasca*f** prezumanta cacharishcami canga.

8Paimi gentecunaman llullashpa crichingapac, tucui cai pachapi tiyac llactacunata puringa. Shinami Gog nishca, Magog nishca soldadocunatapish macanacungapac tandachinga. Chai soldadocunaca mama cuchapi tiyac t'iyu shinami canga.

9Chaicunaca tucui cai allpata quillpashpami, Diospaclla caccuna causana Dios c'uyashca pueblotaca muyushpa shayaringacuna. Ashtahuanpish jahua pachamanta nina urmashpami, tucui tucuchinga.

10Chai llullashpa crichic diablotaca azufrehuan rupacuc nina cuchamanmi shitashca carca. Chaipica llullashpa huillactapish, manchana animaltapish shitashcami carca. Chaipica tutapish, punzhapish huiñaitami llaquichishca canga.

Mandashpa tiyarinapac ñaupapi taripana cashcamanta

11Chai q'uipaca shuc jatun yuraclla mandashpa tiyarinapi shuc tiyacuctami ricurcani. Paipac ñaupamantaca cai pachapish, jahua pachapish tucui chingarishpami maipi mana ricurirca.

12Chaipica huañushcacunatami jatuncunatapish, uchillacunatapish mandashpa tiyarinapac ñaupapi shayacucta ricurcani. Shinallatac librocunapish pascashcami carca. Huiñaita causangapac quillcachina libropi quillcashcatapish pascashcatami ricurcani. Chai librocunapica chai huañushcacuna imata ruhuashcatami quillcashca carca. Chai librocuna nishca shinami taripashca carca.

13Chai punzhapica huañushcacunataca mama cuchamantapish, ucu pachamantapish, huañuimantapish paicuna imata ruhuashca shinallatac taripachunmi llucshirca.

14Chai q'uipaca Ucu Pachatapish, Huañuitapish rupacuc nina cuchapimi shitashca carca. Chaica q'uipa huañuimi.

15Huiñaita causangapac quillcachina libropi mana quillcashcacunataca, rupacuc nina cuchapimi shitashca carca.