SANTIAGO 2 - Nuevo Testamento en Quichua Cañar 1996

Pitapish mana ch'icanyachinamanta

1Ñuca c'uyashca criccuna, cancunaca ñucanchic sumaimana Apunchic Jesucristota criccuna cashcamantaca, “caica allimi, chaica mana allichu” nishpaca, mana ch'icanyachinachu canguichic.

2Cai shina yuyarishunchic: Cancunapac tandanacuimanca shuc alli chayuc runa curi sorteja churashca, sumac churanahuan yaicungachari. Shinallatac shuc huaccha, imata mana charic mauca churanahuan runapish yaicungachari.

3Chai chayuc runa yaicucpica, cushilla c'ayashpami: “Caipi tiyari” nishpa, alli tiyarinapi tiyachinguichicman. Cutin caishuc huaccha runataca: “Canca caillapi shayari, mana cashpaca pambapi tiyari” ninguichicmanmi.

4Chai shina cancunapurallatac “caica allimi, chaica mana allichu” nishpa ch'icanyachishpaca, mana alli yuyaicunahuanmi ruhuacunguichic.

5Ñuca c'uyashca criccuna, caita uyaichic: Taita Diosca cai pachapi imata mana chariccunataca, crishcahuan chayuc tucuchunmi acllarca. Dios maipi mandacucpi paita c'uyaccuna pai cusha nishcata japichunmi, chashnaca acllarca.

6Shina cacpipish cancunaca “imata mana charinchu” nishpami, huacchacunataca yangapi churanguichic. Cancunata llaquichishpa, juezpacman apaccunaca, ¿manachu chayuccuna can?

7¿Manachu paicunallatac cancuna alli nina sumaimana Apunchic Jesuspac shutitapish mana allichu nishpa rimancuna?

8Tucuimanta yalli mandashcata pactachishpaca, allitami ruhuanguichic. Dios quillcachishcapica: “Can quiquinllatac ima shinami c'uyaringui, chai shinallatac shuccunatapish c'uyangui” ninmi.

9Ashtahuanpish “caica allimi, chaica mana allichu” nishpaca, cancunallatacmi juchallinguichic. Shinallatac Dios mandashcata mana cazushcamantaca, juchanchishcami cana canguichic.

10Maijanpish tucui mandashcacunata pactachicushpapish, shuc mandashcallata mana pactachishpaca, tucui mandashcata mana pactachishca shinallatacmi tucun.

11Taita Diosllatacmi: “Ama huaclliringui” shinallatac “ama huañuchingui” nirca. Shina cashcamanta maijan mana huacllirishpapish huañuchishpaca, tucui mandashcacunata mana pactachic shinallatacmi tucun.

12Ñucanchicta huatashca shinamanta cacharichic mandashcapi nishca shinami, Diosca taripanga. Shina cashcamanta imatapish allita rimaichic, shinallatac allita ruhuaichic.

13Shuccunata mana llaquiccunataca, paicunatapish mana llaquishpami, Taita Diosca taripashpa llaquichinga. Ashtahuanpish shuccunata llaquiccunataca, taripana punzhapica alli ningami.

Crishpaca, imata ruhuashpatac ricuchina cashcamanta

14Ñuca c'uyashca criccuna, “cricmi cani” nishpapish, imapish allicunata mana ruhuashpaca, ¿ima allitac cangayari? Chashna “cricmi cani” nishpallaca, ¿paica quishpiringachu?

15Cai shina yuyarishunchic: Cric pani cashpa, cric huauqui cashpa, churana illac, micuna illac causacungachari.

16Chaita ricushpapish, maijan cancunapuramanta ima illashcata mana cushpa: “Allilla richic, alli churarichic, alli micuichic” nishpaca, ¿ima allitac cangayari?

17Chai shinallatacmi crishpapish, ima allita mana ruhuacpica, mana crishca shinallatac canga.

18Ashtahuanpish maijanca: “Canca cricmi cangui, cutin ñucaca allicunata ruhuacmi cani” ningachari. Chashna nictaca: “Ima allita mana ruhuashpaca, can crishcata ricuchinguichari” ninimi. Cutin ñucaca imatapish allita ruhuashpaca, cric cashcatami ricuchisha.

19Canca shuclla Dios tiyashcatami cringui. Chai shina crishpaca, allitami ruhuangui. Chai shinallaca supaicunapish crincunami, shinallatac manchaihuanpish chucchuncunami.

20Ama upa shina caichu. Can crishpapish, ima allita mana ruhuashpaca, mana crishca shinallatacmi cangui.

21Ñucanchic ñaupa taita Abrahamtaca, paipac churi Isaacta huañuchingapac Diosman cushcamantami, Taita Diosca “cashcata ruhuacmi” nishpa chasquirca.

22Taita Abrahamca chashna ruhuashpami, pai crishcataca ricuchishca. Chashna ruhuashcamantami, pai tucui shunguhuan allita crishcata Diosca ricurca. Chaitaca yuyarinami canguichic.

23Chashnami Dios quillcachishcaca pactarca. Chaipica: “Abrahamca Taita Diosta crircami. Chashna crishcamantami Taita Diosca paihuan alli tucuchun chasquirca” ninmi. Chaimantami Abrahamtaca Taita Diosca “ñucahuan apanacucmi cangui” nirca.

24Taita Diosca “cricmi cani” nicllapica mana chasquinchu, ashtahuanpish allita ruhuashcamantami chasquin. Chaitaca ña ricunguichicmi.

25Chai shinallatacmi chai huacllirishpa causac Rahab huarmitapish, chai llactata pacalla ricungapac shamuccunata huasipi chasquishpa shuc ñanta cachashcamanta, Taita Diosca “cashcata ruhuacmi” nishpa chasquirca.

26Shina cacpica, shuc cuerpoca alma illacllaca mana causai pudinchu. Chai shinallatacmi “cricmi cani” nishpalla, ima allita mana ruhuashpaca, mana crishca shinallatac can.