1 TESALONICENSES 5 - Nuevo Testamento en Quichua Cañar 1996

1C'uyashca criccuna, Apunchic Jesús ima huata, ima punzha cutimuna cashcataca, mana quillcanachu cani.

2Cancunallatac Apunchic Jesús shuc shuhua tuta shamuc shina, mana yuyashca horas cutimuna cashcataca, allimi yachanguichic.

3Gentecunaca: “Alli sumactami causacunchic” nicucpica, jatun llaquica huicsa junda huarmita huachana nanai japic shinami cungailla japinga. Chai jatun llaquimantaca pipish mana quishpiringachu.

4Ashtahuanpish c'uyashca criccuna, cancunaca mana amsapi shinachu canguichic. Chashna cashcamanta Apunchic Jesús shuhua shina cungailla cutimushpapish, mana cungailla manchachingachu.

5Tucui cancunami achiclla punzhapi shina canguichic. Mana amsapi, mana tutapi shinachu causacunchic.

6Chashna cashcamantami caishuccuna suiñucuc shinaca ña mana causana canchic, ashtahuanpish ñucanchicca alli yuyaihuanmi riccharishca shina causana canchic.

7Maijanpish suiñucca tutami suiñun. Shinallatac maijanpish machacca tutami machan.

8Ashtahuanpish ñucanchicca punzhapi shina causacushcamantaca, alli yuyaihuanmi c'atina canchic. Fierro churanata churaric shinaca, Apunchic Jesusta crishpa, c'uyaihuan causanami canchic. Chashnallatac umapi fierro cascota churaric shinaca, quishpirina yuyaihuanmi cushicushpa shuyana canchic.

9Ñucanchictaca Taita Diosca p'iñarishpa, llaquichingapacca mana acllarcachu. Chaipac randica, ñucanchic Apunchic Jesusmanta quishpirichunmi acllarca.

10Causacushpapish, huañushpapish paihuan pacta cachunmi, Jesucristoca ñucanchicmanta huañurca.

11Chashna cashcamanta ima shinami cunan cancuna c'aticuc shinallatac, caishuc chaishuchuan alli c'atina yuyaita cunacushpa, ayudanacushpa causaichic.

Criccunata Pablo cunashcamanta

12C'uyashca criccuna, cancunapurapi Apunchic Jesuspacta ruhuashpa, cunashpa yachachiccunataca alli cazuichic nishpami mañanchic.

13Paicuna allita ruhuacushcamantaca, c'uyashpa alli ninami canguichic. Shinallatac caishuc chaishuchuanmi alli sumacta causana canguichic.

14Shinallatac c'uyashca criccuna, chai imata mana ruhuasha nic q'uillacunatapish rimaichic, llaquilla caccunatapish cushichichic, manarac sinchi criccunatapish yachachichic. Shinallatac tucuihuan mana p'iñarishpa, alli shungu caichic.

15Shuccuna ima mana allita ruhuacpipish, paicunatapish chashnallatac ruhuanamantaca huacaichirichic. Chaipac randica punzhanta cancunapurapipish, tucui gentecunahuanpish allita ruhuanata munaichic.

16Punzhanta cushilla caichic.

17Taita Diosman mañanataca ama saquichicchu.

18Tucui imamantapish Diostaca pagui nicuichiclla. Jesucristota criccunataca chashna ruhuachunmi, Taita Diosca munan.

19Diospac Espíritu imata ruhuachun yuyaita cucpica, ninata huañuchic shina pacta mana ruhuashun ninguichicman.

20Dios ima nicushcata Diosllatac huillana yuyaita cucpica, pacta mana uyashun ninguichicman.

21Alli cashcata, mana alli cashcataca alli yuyarichic. Alli cashcataca yuyarirashca, huacaichishpa causaichic.

22Tucui laya mana allicunamanta anchurichic.

23Sumac causaita cuc Diosllatac cancunapac espiritutapish, almatapish, cuerpotapish Apunchic Jesús cutimuna punzhapacca paipaclla, pi mana juchanchipacta ruhuashpa huacaichichun.

24Cancunata acllac Diosca imatapish pactachic cashcamantami, tucui caicunatapish pactachinga.

Ña tucuchingapac “allilla cashca cachun” nishcamanta

25C'uyashca criccuna, ñucanchicmantapish Taita Diosman mañaichic.

26Tucui criccunata chuya shunguhuan muchashpa, caishuc chaishuc “allilla cashca cachun” ninacuichic.

27Apunchic Jesuspac shutipimi, cai quillcataca tucui criccunapac ñaupapi rizashpa huillachun nini.

28Ñucanchic Apunchic Jesucristoca tucui cancunaman paipac sumaimana c'uyaita cushca cachun.