1 TIMOTEO 4 - Nuevo Testamento en Quichua Cañar 1996

“Pandata yachachiccuna tiyangami” nishcamanta

1Chashna cacpipish q'uipa punzhacunapi ima tucuna cashcataca, allimi Diospac Espirituca huillacun. Chai punzhacunapica maijancunaca llullac espiritucuna ima nishcata cazushpa, supaicuna yachachishcatapish c'atishcamantami, crishcatapish saquishpa ña mana c'atishun ningacuna.

2Chashna yachachiccunaca mishqui shimi, jayac shungu llullaccunami. Shinallatac paicunapac shungupi diablo unanchishcamantaca, ima allita ruhuana yuyaitapish mana charincunachu. Paicuna nishcatami gentecunaca uyancuna.

3Chai yachachiccunaca cazaranapish, maijan micunata micunapish mana allichu nincunami. Ashtahuanpish Taita Diosca cashcata yachac criccunamanca paita pagui nishpa micuchunmi, chaicunataca ruhuarca.

4Taita Dios ruhuashcacunaca, tucuimi alli. Chaimantami Diosta pagui nishpa, imatapish mana millashpa chasquinalla canchic.

5Dios rimashca shimimantapish shinallatac Diosman mañashcamantapish, imapish Diospacllami tucun.

Jesucristopactaca allita ruhuana cashcamanta

6Cai rimashcacunata criccunaman yachachishpa, shinallatac crinata yachachic shimicunatapish, can c'aticushca alli yachanacunatapish micunata micuc shina yachacushpaca, Jesucristopacta allita ruhuacmi cangui.

7Imapish yanga parlocunataca ama uyanguichu. Chaipac randica cuerpota pucllangapac allichiric shina, Taita Diospac ñaupapi alli causana yuyailla cangui.

8Cuerpo sinchiyachun pucllanaca, ashacamanca allimi. Ashtahuanpish Taita Dioshuan alli canami tucuimanta yalli allica. Cai causaipacpish, q'uipa causaipacpish allicunatami apamun.

9Cai ñuca rimashcaca chashnatac cashcamantami, tucui mashna crina canchic.

10Ñucanchicca causac Diospimi shunguta churashcanchic. Paica tucui cai pachapi causaccunata Quishpichicmi. Ashtahuancarin paita criccunatami quishpichin. Chaimantami maijancuna p'iñacpipish, llaquita apashpa paipactaca ruhuashpa c'aticunchic.

11Cai ñuca nishcacunataca cazuchun nishpa yachachingui.

12Criccuna canta ricushpa allita causachunca, allita ruhuashpa, alli shimicunata rimashpa, alli c'uyac, alli cric, shinallatac ima mapa yuyaicuna illacmi cana cangui. Pacta cantaca “huambraracmi” nishpa rimanmancuna.

13Ñuca shamungacamanca, Dios rimashca shimita criccunaman rizashpa, yachachishpa cunangui.

14Criccunata pushaccuna cambac uma jahuapi maquita churashpa mañacpica, Dios imata ruhuachun cushcata pacta cungaringuiman. Paicunaca Taita Dios yuyaita cucpimi, chashnaca ruhuarcacuna.

15Diospacta ruhuashpa alli c'aticushcata tucui mashna ricuchunca, cai ñuca nishcacunapi tucui yuyaita churangui.

16Can ima shina yachachicushcamanta, shinallatac ima shina causacushcamantapish alli cuidaringui. Chashna ruhuacushpaca canpish quishpiringuimi, shinallatac can huillashcata uyaccunapish quishpiringacunami.