1 CORINTIOS 10 - Nuevo Testamento en Quichua Cañar 1996

Ruhuashcalla dioscunata mana adorana cashcamanta

1C'uyashca criccuna, ñucanchic ñaupa taitacunaca p'uyu llandupi cashpami, Puca Cuchataca chimbarcacuna. Chaitaca amatac cungaringuichicchu ninimi.

2Chashna p'uyuhuanpish, cucha yacuhuanpish bautizaric shina tucushpami, Moiseshuan shuc shinalla tucurcacuna.

3Shinallatac tucui paicunami Dios cushca micunata micurcacuna.

4Dios cushca ubianatapish ubiarcacunami. Paicunaca paicunahuan ricuc Rumimanta llucshicuc yacutami ubiarcacuna. Chai Rumica Cristomi carca.

5Chashna cashpapish achcacunami Diospac ñaupapica mana alli carcacuna. Chaimantami chai shitashca pamballapitac huañurcacuna.

6Tucui chaicunaca, paicuna millaita munashca shina ñucanchicpish ama millaita ruhuachunmi, chashnaca tucurca.

7Chaimanta paicunapuramanta maijancuna shina, ruhuashcalla dioscunata ama adorashunchic. Dios quillcachishcapica: “Gentecunaca micungapac shinallatac ubiangapacmi tiyarirca. Chai q'uipaca imapish mana allita ruhuashpa, cushicungapacmi jatarircacuna” ninmi.

8Paicunapuramanta maijancuna huacllirishca shina, ama huacllirishunchic. Chashna ruhuashpami, shuc punzhallapi ishcai chunga quimsa huaranga huañurcacuna.

9Shinallatac paicunapuramanta maijancuna shina, Mandac Diosta caita chaita ruhuai nishpa, ama p'iñachishunchic. Chashna ruhuashpami, paicunaca culebra canishca huañurcacuna.

10Paicunapuramanta maijancuna shina, Diosta p'iñashpa ama rimashunchic. Chashna c'amishcamantami, chai huañuchic ángel shamushpa paicunataca huañuchirca.

11Ñaupa taitacuna chashna tucushcaca ñucanchicta yuyachishpa, tucuri punzhacunapi ñucanchic causaccunata yachachingapacmi, Dios quillcachishcapipish quillcachishca cashca.

12Shina cashcamanta “allimi cani” niccunaca ama urmangapacca, alli huacaichirichun.

13Cancunaca pi mana apaipac mana alli munaitaca mana apashcanguichicchu. Shinallatac Taita Diosca cancuna mana apaipac mana alli munaita apachunca mana saquingachu. Taita Diosca imatapish pactachic cashpami, cancuna mana alli munaita jahualla apachunca, chai munaimanta llucshina yuyaitapish cunga.

14Chaimanta c'uyashca criccuna, ruhuashcalla dioscunata adoranamanta anchurichic.

15Yachaccunata shinami cancunataca rimani. Ñuca nishcata uyashpaca, cancunallatac yuyarichic.

16Dios cushca vinota ubiashpaca, Diostami pagui ninchic. Chai vinota ubiashpaca, Cristopac yahuarhuanmi shuc shinalla tucunchic. Tandata micushpapish, Cristopac cuerpohuanmi shuc shinalla tucunchic.

17Taucacuna cashpapish, tucuimi chai tandallatatac micunchic. Chai shina cashcamantami tucui criccuna shuc cuerpo shina canchic.

18Israelcunata*f** ricushpa yuyarichic. Animalta huañuchishpa, Diosman cushpa, altarpi rupachishca aichata micuccunaca, tucuimi Taita Dioshuanca shuc shinalla tucuncuna.

19Chashna nishpaca, mana ruhuashcalla dioscunata allimi ninichu. Shinallatac ruhuashcalla diosman cushpa huañuchishca aichami shuc aichacunata yalli alli nishpapish, mana ninichu.

20Ashtahuanpish Diosta mana ricsiccunaca animalcunata huañuchishpa cushpapish, diablomanmi cuncuna ninimi. Diosmanca mana cuncunachu. Ñucaca ima mana allita ruhuashpa, diablohuan ama shuc shinalla cachun ninimi.

21Apunchic Jesusta yuyarishpa, vinota ubiangapac tiyarishpaca, mana cutin diablopacta ubiangapacpish tiyarinachu canguichic. Shinallatac Apunchic Jesusta yuyarishpa tandata micungapac tiyarishpaca, mana cutin diablopacta micungapac tiyarinachu canguichic.

22Chashna ruhuashpaca, ¿Apunchic Jesús p'iñarichunchu munanchic? ¿Ñucanchicca paita yalli sinchichu canchic?

Imata ruhuashpapish, Dios alli nishca cachun ruhuanamanta

23“Imata ruhuasha nishpapish, ruhuanallami” nincunami. Chaica chashnatacmi. Shina quiquin munaita ruhuanalla cacpipish, criccunata sinchiyachingapacca mana tucuichu alli can.

24Quiquinpac allitaca mana mashcanachu, ashtahuanpish shuccunapac allitami mashcana can.

25Aicha c'atuccunapacman rishpa randishpaca, ama caita chaita yuyashpa, tucui randishcata micuichiclla.

26Cai pachapish, tucui cai pachapi ima tiyashcapish Mandac Diospac cashcamantami, chashnaca nicuni.

27Shuc mana cric ima micuita carangapac c'ayacpica, rinata munashpaca, ama caita chaita yuyashpa, tucui ima carashcatapish micuichiclla.

28Shina cacpipish maijan: “Cai aichaca animalta huañuchishpa, ruhuashcalla diosman cushcami” nicpica, ama micuichicchu. Chai nictapish, yuyaitapish ama ima mana allita ruhuachunmi, chashnaca nini.

29Cancunapac yuyaimantaca mana rimanichu, ashtahuanpish chai nicpac yuyaimantami rimacuni. Ñucaca imatapish ruhuai pudinimi. Shina cashpapish shuccunapac yuyaipi mana alli nishpa juchanchichunca, mana munanichu.

30Ñuca imata micushpapish, Diosta pagui nishpa micucpica, ¿ima nishpatac ñuca micushcamanta shuccunaca rimangayari?

31Chaimanta imata micushpapish, imata ubiashpapish, shinallatac imata ruhuashpapish, Dios alli nishca cachunmi ruhuana canguichic.

32Cancunaca israelcunatapish,*f** mana israelcunatapish,*f** shinallatac Diospaclla cac tandanacushca criccunatapish ama ima mana allita ruhuashpa pandachichicchu.

33Ñucaca mana quiquinpac allita mashcashpami, imata ruhuashpapish tucuipac allipac paicuna quishpirichun ruhuacuni.