TITO 3 - Nuevo Testamento en Quichua Cañar 1996

Criccuna ima shina causanamanta

1Criccunataca llactata mandaccunatapish, pueblota mandaccunatapish allita cazushpa, imata ruhuachun mandacpipish cushilla ruhuachunlla nishpa yachachingui.

2Pitapish mana allichu nishpa ama rimachun, pihuanpish mana p'iñanacushpa, caishuc chaishuchuan apanacushpa, alli shungu cachun yachachingui.

3Ñaupaca ñucanchicpish Diosta mana cazuc, yuyai illac, juchapi chingarishca, ñucanchic munaillata ruhuashpa cushicuna yuyaillapi huatashca shinami causacurcanchic. Chashna mana allillapi causacushpami, shuccuna ama charichun munashpa, caishuc chaishuchuan p'iñanacushpa causacurcanchic.

4Chashna causacucpipish ñucanchicta Quishpichic Taita Diosca pai c'uyac, llaquic cashcata ricuchishpami,

5ñucanchicta quishpichirca. Mana ñucanchic ima allita ruhuashcamantachu quishpichirca, ashtahuanpish ñucanchicta llaquishcallamantami quishpichirca. Taita Diosca paipac Espirituhuan tucui juchacunamanta chuyayachishpami, mushuc causaita curca.

6Ñucanchic Quishpichic Jesucristomantami, Taita Diosca paipac Espirituta ñucanchicmanca yallita curca.

7Taita Dios yallita c'uyashpami, paihuan alli tucushpa, ñucanchic shuyacushca huiñai causaita japichun chashnaca ruhuarca.

8Chaica chashnatacmi can. Chaimanta Taita Diosta criccuna allicunallata ruhuashpa causanataca, allita yachachina cangui. Chai alli ruhuanacunami tucui mashna alli causangapac alli can.

9Shina cacpipish imapish yanga parlocunamanta, mana yupaipac ñaupa taitacunapac shuticunamanta, Moisés mandashcacunata pactachinami nishpa p'iñanacunamanta, shinallatac ima shuctac p'iñanacunamantapish huacaichiringui. Chaicunaca imapish mana alli cashpami yangalla can.

10Maijanpish tandanacushca criccunapurapish p'iñanacuipi churacpica, ishcai cutincaman cunashpa rimangui. Chashna cunashcata mana uyacpica, tandanacushca criccunapuramanta llucchishpa cachangui.

11Chai runa pandarishcamanta mana allita ruhuashpa, paillatac llaquiman ricushcata yachanami cangui.

Tito imata ruhuana cashcamanta

12Artemas runata cashpa, Tíquico runata cashpa cambacman ñuca cachacpica, Nicópolis pueblopi ñucata ricungapac ima shinapish shamunata yuyangui. Tamia quillacunapica chaipimi canata munani.

13Chai abogado Zenasta, shinallatac Apolosta paicunapac rinapi imapish ama illachun, ima shinapish imallata cushpa ayudangui.

14Chashna ñucanchicpuramanta caccunaca allita ruhuashpa, huacchacunaman ima illashcata cushpa ayudashpa, Taita Diospac ñaupapi allicuna cachunmi nini.

Tucuchingapac “allilla cashca cachun” nishcamanta

15Tucui ñucahuan caccunami cantaca “allilla cashca cachun” nishpa cachancuna. Shinallatac ñucanchicta c'uyac caishuc criccunatapish “allilla cashca cachun” nishpa cungui ninimi.

Taita Diosca paipac sumaimana c'uyaita tucui cancunaman cushca cachun ninimi.