APOCALIPSIS 8 - Nuevo Testamento en Quichua Cañar 1996

Canchis niqui unanchishcata pascashcamanta

1Pactalla Oveja*f** canchis niqui unanchishcata pascacpica, chaupi mama pacha shinatami jahua pachapica chulunlla carca.

2Chai q'uipaca canchis angelcuna Taita Diospac ñaupapi shayacuctami ricurcani. Paicunaca canchis cornetatami chasquirca.

3Chai q'uipaca shuc angelmi curimanta ruhuashca inciensota churanahuan shamurca. Chashna shamushpaca, altar chaquipimi shayarirca. Chaica achca inciensota chasquishpami, mandashpa tiyarinapac ñaupapi cac curimanta ruhuashca altarpi Diosman curca. Chashna ruhuashpaca, Taita Diospaclla caccuna Diosman mañashcandic tandachishca ricurichunmi, chashnaca curca.

4Incienso rupashcapish, Taita Diospaclla caccuna Diosman mañashcandicmi, jahua pacha Taita Diospac ñaupaman angelpac maquimantaca rirca.

5Chaimanta ángel incienso churanata japishpaca, altarpi tiyac nina brazasta jundachishpami cai pachaman shitarca. Chashna shitacpica, urcucuna tulun nishcapish, rimashcacunapish uyarircami. Relampa achic nishcapish ricurircami, shinallatac allpapish chucchurcami.

Angelcuna cornetacunapi tocashcamanta

6Chai canchis angelcunaca paicuna charicushca cornetapi tocangapacmi allichirirca.

7Punta niqui ángel tocacpica, yahuarhuan chapushca nina rundu urmashpaca, cai allpata quimsapi chaupishcamanta shuc partetaca yuracunandic, q'uihuacunandicmi rupachirca.

8Ishcai niqui ángel tocacpica, mama cucha yacumanmi shuc jatun urcu rupacuc shina urmarca. Shina urmacpica, mama cucha yacuca quimsapi chaupishcamanta shuc partemi yahuar shina pucayarca.

9Chashna pucayacpica mama cuchapi cac barcocunapish, shinallatac chaipi causac animalcunapish quimsapi chaupishcamanta shucca tucuimi tucurirca.

10Quimsa niqui ángel tocacpica, shuc jatun lucero jagan nishpa rupacuc shina jahua pachamanta urmashpaca jatun yacucunapish, tucyacuc yacucunapish quimsapi chaupishcamanta shuc partemanmi urmarca.

11Chai luceroca Jayac shutimi carca. Shinami yacucunata quimsapi chaupishcamanta shuc partetami jayacyachirca. Chai jayac yacuta ubiashpaca, achca gentecunami huañurca.

12Chuscu niqui ángel tocacpica, quillapish, intipish, shinallatac lucerocunapish quimsapi chaupishcamanta shuc partemi amsayarca. Shina amsayacpimi quimsapi chaupishcamanta shuc partemi punzhapish, tutapish mana achicyarca.

13Chai q'uipaca shuc cóndor jahuata volashpa puricuctami ricurcani. Shina puricushpa sinchita rimashpami:

—¡Aij, aij, cai allpa pachapi causaccunalla! ¡Caishuc quimsa angelcuna tocacpica, jatun llaquimi tiyanga!— nirca.