ROMANOS 5 - Nuevo Testamento en Quichua Cañar 1996

Taita Dioshuan ña alli tucushcamanta

1Ñucanchic crishcamanta paihuan alli tucuchun Taita Dios chasquicpimi, Apunchic Jesucristomanta Taita Dioshuan cushi canata charinchic.

2Ñucanchic Apunchic Jesucristota crishcallamantami, Taita Diosman cuchuyashpa, pai mai c'uyac cashcataca yachanchic. Shina yachashpami sinchiyashpa, Diospac sumaimana cashcata japina yuyailla cashcamanta cushicunchic.

3Mana chaillamantachu cushicunchic, ashtahuanpish llaquita apashcamantapish cushicunchicmi. Chai llaquicunami mishangapac ashtahuan alli crina yuyaita cun.

4Chashna alli crina yuyaita charishpami, alli nishca cashun. Chai shina alli nishca cashpami, cushicuihuan shuyacushun.

5Taita Diosca paipac Espirituta cushpami, ñucanchic shungupica yallita c'uyaita churashca. Chaimanta mana yangamantachu shuyacunchic.

6Ñucanchic maita mana quishpiripac cacpimi, Taita Dios acllashca punzha pactacpi, Cristoca juchayuccunamanta huañurca.

7Cashcata ruhuacmantaca maijan huañusha nicushpapish, mana huañunmanllachu. Alli shunguyuc runamanta maijan huañusha nicushpapish, huañunmanchari.

8Ashtahuanpish ñucanchic juchayuccuna cacpica, Cristo ñucanchicmanta huañucpimi, Taita Diosca ñucanchicta c'uyac cashcata ricuchin.

9Cunanca Apunchic Jesucristo huañushcamantami, Taita Diosca paihuan alli tucuchun ñucanchictaca chasquishca. Chashna cashcamanta Dios p'iñarishpa, llaquichina cashcamantaca Cristollatac ñucanchictaca quishpichingallami.

10Taita Dioshuan ñucanchic p'iñashca cacpiracmi, paipac Churi huañushcamanta paihuan alli tucuchun ñucanchictaca chasquirca. Ña Dioshuan alli tucushcamantami, Cristo causacushcamantaca ñucanchicta quishpichingalla.

11Chaillapish mana canchu, ashtahuanpish Apunchic Jesucristomanta Taita Dioshuan alli tucushcamantami Diosmanta cushicunchic.

Adanmantapish, Cristomantapish

12Shuc runa juchallishcamantami cai pachapi juchaca yaicurca. Chai juchamantami huañuica tiyan. Shinallatac tucui mashna juchallishcamantaca huañunami can.

13Taita Dios mandashcacunata manarac cucpimi, juchaca ña cai pachapica tiyarca. Shina cacpipish mandashcacuna mana tiyacpica, pi mana juchanchishcachu can.

14Shina cacpipish Adanpac causai punzhamanta Moisespac causai punzhacamanca, tucui juchayuccunami huañuna carca. Shinallatacmi maijanpish juchata ruhuaccunaca Adán shina Dios mandashcataca mana cazushpa juchallishpapish, mana juchallishpapish huañuna carca. Adanca chai shamuna cashca runata ricuchicllami carca.

15Adán juchallishcapish Taita Dios c'uyashpa quishpichisha nicpica, imapish mana canchu. Adán juchallishcallamantami tucui gentecuna huañuna carca. Shina cacpipish Taita Dios c'uyashcallamanta Jesucristota cachashpa, paillamanta quishpichisha nishcami, tucuimanta yalli ashtahuan alli can.

16Shuc runalla juchallishcapish Taita Dios c'uyashpa quishpichisha nicpica, imapish mana canchu. Adán juchallishcallamantami, Taita Dios juchanchishpa llaquichinaca yaicurca. Shina cacpipish Taita Dios c'uyashpa, quishpichisha nishcallamantami, achca juchacunamantapish mana juchanchishpa saquishcalla.

17Shuc runa juchallishcallamanta tucui gentecuna huañuna cacpica, Taita Diosca c'uyashcallamanta Jesucristota cachashpa, paihuan alli tucuchun chasquishcacunacarin Cristollamantami mushuc causaita causanga.

18Ima shinami Adán juchallishcamanta tucui gentecuna juchayuc tucushpa llaquichina tucurca, chai shinallatacmi Apunchic Jesucristo cashcata ruhuac cashcallamanta, tucui gentecuna mana juchanchishca cashpa, causaita charingacuna.

19Shuc runa mana cazushcamantami, tucui gentecuna juchayuc tucurca. Chai shinallatacmi shuc runa cazushcamantaca, tucui gentecunata Taita Diosca paihuan alli tucuchun chasquinga.

20Mandashcacunata Dios cucpica, juchaca ashtahuanmi mirarirca. Chashna miraricpicarin, Taita Diosca ashtahuanmi c'uyaita ricuchirca.

21Ima shinami juchaca cai pachaman yaicushpa tucuita huañuiman aparca, chai shinallatacmi Taita Diosca paipac c'uyaillamanta, Apunchic Jesucristomanta paihuan alli tucuchun ñucanchicman huiñai causaita cunga.