APOCALIPSIS 17 - Nuevo Testamento en Quichua Cañar 1996

Huacllirishpa causac huarmita llaquichishcamanta

1Copacunata charicuc canchis angelcunapuramanta shuc shamushpaca:

—Shamui, yacucuna jahuapi tiyacuc huacllirishpa causac huarmita llaquichigricushcata ricuchisha.

2Chai huarmihuanmi tucui cai pachapi tiyac jatun mandaccunaca mana allita ruhuashpa huacllirircacuna— nirca.

3Chai q'uipaca Diospac Espíritu ñucata japicpi shitashca pambaman ángel pushacpimi, shuc huarmi chai manchana puca animalpi montashca tiyacucta ricurcani. Chai animalca canchis umayuc, chunga gachuyuc, shinallatac cuerpopica Diosta c'amishpa quillcashcami carca.

4Chai huarmica morado, shinallatac amsa puca churanata churashcami carca. Shinallatac curihuanpish, sumac rumihuanpish, perlashuanpish allichishca huarmimi carca. Chai huarmica millanayaitapish, huacllirishcatapish jundachishca curi copatami maquipi charicurca.

5Chai huarmipac frentepica pipish mana ricsishca quillcami tiyacurca. Chaipica: “¡Jatun Babilonialla! Huacllirishpa causaccunapacpish, cai pachapi imatapish millaita ruhuaccunapacpish mamami cangui” nishpa quillcashcami carca.

6Chai huarmitaca Taita Diospaclla caccunapac, shinallatac Jesusmanta huillaccunapac huañuchishca yahuarhuan machashca cashcatami ricurcani. Chaita ricushpaca, yallitami mancharishpa saquirircani.

7Chashna macharicpimi angelca:

—¿Ima nishpatac yallita mancharingui? Chai huarmipi quillcashca imata nisha nicushcatapish, chai manchana animal canchis umayuc, chunga gachuyuc imata nisha nicushcatapish ñami huillagrini.

8Can ricushca manchana animalca ñaupamanmi tiyarca, cunanca ña mana tiyanchu. Shina cashpapish huiñaita jatun llaquipi chingaringapacllami, ucu pacha jutcumantaca llucshinga. Taita Dios cai pachata ruhuashca punzhamanta pacha, huiñaita causangapac quillcachina libropi mana quillcachishca cai pachapi causac gentecunaca chai utcaman tiyashca, cunanca mana tiyac, cutin shamuna cashca manchana animalta ricushpaca, yallitami manchangacuna.

9Caicunata yachangapacca alli yuyaiyuc, yachaisapami cana can. Canchis umacunaca chai huarmi tiyacuc canchis urcucunatami nisha nin,

10shinallatac canchis jatun mandaccunatapish nisha ninmi. Pichca jatun mandaccunaca ñami tucurirca. Chaimanta shucca mandacunracmi. Shinallatac shucca manarac mandangapac shamunchu. Shina shamushpapish ashacamanllami mandanga.

11Ñaupaman tiyashca, cunanca mana tiyac manchana animalca chai canchis mandaccunapuramanta cashpapish, pusac niqui mandacmi. Paimi huiñaita jatun llaquipi chingarinaman ricun.

12Can ricushca chai chunga gachucunaca chunga jatun mandaccunatami nisha nin. Chai mandaccunaca manarac mandancunachu. Shina cashpapish shuc pachallatacmi chai manchana animalhuan ishcai tucushpa mandanata chasquinga.

13Chai chunga jatun mandaccunaca chai manchana animalmanmi mandanatapish, imata ruhuaclla canatapish cungapac shuc yuyailla tucushcacuna.

14Chaicunaca Pactalla Ovejahuanmi*f** macanacunga. Shina cacpipish, amocunapac Amo, jatun mandaccunapac Jatun Mandac cashcamantami Pactalla Ovejaca Dios c'ayashpa acllashca, paita allita c'aticcunahuan tucushpa, paicunata mishanga— nirca.

15Angelca caitapish nircami:

—Chai huaclliric huarmi tiyacushca yacucunaca aillucuna, tauca laya gentecuna, tauca laya rimaita rimaccuna, shinallatac llactacunami can.

16Can ricushca chai chunga gachucunapish, manchana animalpish huaclliric huarmita p'iñashpami, tucuita quichushpa lluchullata shitangacuna. Paipac aichataca micungacunami, shinallatac rupachingacunami.

17Taita Diosllatacmi paicuna imata ruhuashpapish, pai munashcata ruhuachun shungupi yuyaita curca. Shina cucpimi Taita Dios huillashca pactangacamanca shuc yuyailla tucushpa, chai manchana animalmanca paicuna shina mandanata cungacuna.

18Can ricushca huarmica tucui cai pachapi tiyac jatun mandaccunata mandac jatun pueblomi— nirca