1 CORINTIOS 16 - Nuevo Testamento en Quichua Cañar 1996

Criccunaman cachangapac cullquita tandachichun nishcamanta

1Diospaclla cac criccunaman cachangapac cullquita tandachingapacca, Galacia llactapi cac criccunaman ñuca yachachishca shina, cancunapish ruhuana canguichic.

2Cancunaca mashnata japishcamantaca, tucuillatacmi ashallatapish ch'icanyachishpa, semana callari domingo punzhaca tandana canguichic. Ñuca chayacpi ama tandana tucuchunmi, chashna ruhuachun nini.

3Ñuca chayashpaca, cancuna acllashca criccunallatatacmi quillcata ruhuashpa, cancuna tandachishca cullquitapish Jerusalén pueblopi saquigrichun cachasha.

4Shinallatac ñucapish rina cacpica, paicunaca ñucahuan ringacunallami.

Maijan llactacunallaman rina cashcata Pablo yuyarishcamanta

5Ñuca rishpaca, Macedonia llactatami rina cani. Macedonia llactamantaca Corinto pueblomanmi chayasha.

6Cancunapacman chayashpaca, asha punzhacunacaman saquirishapishchari, mana cashpaca tucui tamia quillacunata saquirishapishchari. Shina saquiricpica, chai q'uipa ñuca maiman rina cacpipish, imatapish ricushpa cachanguichic.

7Cunanca ashata ricushpallaca mana risha ninichu. Apunchic Jesús munacpica, unaicamanmi cancunahuan saquirinata munacuni.

8Ashtahuanpish Pentecostés*f** fiesta punzhacuna chayamungacamanmi, cai Efeso pueblopica cagrini.

9Taucacuna ñucata p'iñacucpipish, Jesucristomanta ñuca huillanaca maipipish pungu pascashca shinami can.

10Timoteo chayacpica, cushilla cachun paitaca alli chasquinguichic. Paica ñuca shinallatacmi Apunchic Jesucristopacta ruhuac can.

11Chaimanta cancunapuramanta maijanpish paitaca ama yangallapi churanguichicchu. Chaipac randica, pai ñucata cushilla ricungapac shamuchun ayudaichic. Ñucaca caishuc criccunahuanmi shuyacuni.

12Shina cacpipish huauqui Apolostaca criccunahuan rishpa, cancunata ricugrichunmi yallita mañarcani. Shina mañacpipish, mana risha nircachu. Shina cashpapish pai rina tucucpica ringallami.

Ña tucuchingapac “allilla cashca cachun” nishcamanta

13Riccharishca shina tucui shunguhuan crishpa, imatapish mana manchashpa, alli sinchiyashpa c'atiraichic.

14Shinallatac tucui imata ruhuashpapish, c'uyaihuan ruhuaichic.

15C'uyashca criccuna, Acaya llactapi quishpirinamanta alli huillaita huillacpica, Estéfanas paipac familiandic punta cric tucushcataca cancunallatac yachanguichicmi. Paicunami shuctac criccunataca servina yuyailla causancuna.

16Shina cashcamantami paicuna shina imatapish ruhuaccunata, shinallatac tucui allita ruhuashpa ayudaccunatapish cazuchun munani.

17Ñuca cancunahuan mana cashpa llaquilla cacpipish, Estefanaspish, Fortunatopish, Acaicopish shamushcamantami ñucaca cushicuni.

18Paicunami cancunata cushichic shinallatac, ñucatapish cushichircacuna. Chai shina ruhuac gentecunataca pagui nicunallami canchic.

19Asia llactapi cac tandanacushca criccunaca “allilla cashca cachun” nishpami cachancuna. Aquilapish, Priscilapish, shinallatac paicunapac huasipi tandanacuc criccunapish Apunchic Jesushuan shuc shinalla tucushcamantami, “allilla cashca cachun” nishpa cachancuna.

20Tucui criccunami “allilla cashca cachun” nishpa cachancuna. Chuya shunguhuan muchashpa, caishuc chaishuc “allilla cashca cachun” ninacuichic.

21Ñucaca Pablomi cani. Ñucami quiquin maquihuan quillcashpa, “allilla cashca cachun” nishpa cachani.

22Maijanpish Apunchic Jesusta mana c'uyactaca, Taita Dios llaquichishca cachun. ¡Ñucanchic Apunchic Jesús, shamuilla!

23Apunchic Jesucristo paipac sumaimana c'uyaita tucui cancunaman cushca cachun.

24Apunchic Jesucristohuan shuc shinalla tucushcamantaca, tucui cancunatami ñucaca c'uyacunilla.