APOCALIPSIS 9 - Nuevo Testamento en Quichua Cañar 1996

1Pichca niqui ángel tocacpica, jahua pachamanta urmashca luceroman ucu pacha jutcuta pascana llaveta cuctami ricurcani.

2Ucu pacha jutcuta pascacpica, jatun hornomanta cushni llucshic shinami achca cushni llucshishpa intitapish, huairatapish amsayachirca.

3Chai cushnimantaca langostacuna*f** llucshishpami, tucui allpa jahuata purirca. Chai q'uipaca alacrán shina millai canatapish chasquircami.

4Chashna chasquicpica allpapi tiyac q'uihuatapish, yuracunatapish, tucui imapish verdella caccunataca ama imata ruhuachunmi cacharca, ashtahuanpish Diospac unanchishcata frentepi mana charic gentecunallata llaquichichunmi cacharca.

5Chaicunataca gentecunata huañuchichunca mana cacharcachu, ashtahuanpish alacrancuna canishca shina, pichca quillacaman nanachishpa llaquichichunmi cacharca.

6Chai punzhacunapica gentecunaca ima shinapish huañunatami munangacuna. Shina yuyacushpapish, mana huañungacunachu. Paicuna huañuita munacucpipish, huañuica mana chayangachu.

7Chai langostacunaca macanacuiman ringapac allichirishca caballocuna shinami carca. Umapica curi coronata churashcami carca. Shinallatac paicunapac ñahuica gentecunapac ñahui shinami carca.

8Paicunapac acchacunaca huarmicunapac accha shinami carca. Quirucunaca leonpac quiru shinami carca.

9Paicuna churarishcaca fierro churana shinami carca. Paicunapac alascunaca macanacuipi achca carretacunata caballocuna aisacpi huacac shinami huajiacurca.

10Chai animalcunaca alacrán shina chupacunapi tucsina aujacuna apashcami carca. Chai aujacunaca pichca quillacaman nanachic canatami charirca.

11Chai animalcunata mandacca ucu pacha jutcu ucumanta llucshic angelmi carca. Chai angelpac shutica hebreo*f** rimaipica Abadón, shinallatac griego*f** rimaipica Apolión shutimi carca.

12Punta llaquica ña tucurinmi. Shina cashpapish ishcaica tiyanracmi.

13Sucta niqui ángel tocacpica, Diospac ñaupapi cac chuscu gachuyuc curi altarmanta shuc rimashca uyarishpaca,

14cornetata charicuc sucta niqui angeltami:

—Eufrates yacu patapi huatashca chuscu angelcunata cachari— nirca.

15Chaimanta chuscu angelcunata cacharishpaca, cai pachapi causac gentecunata quimsapi chaupishcamanta shuc partetami huañuchichun cacharca. Chai angelcunaca chai pacha, chai punzha, chai quilla, chai huata huañuchichun nishcatacmi carca.

16Chaimantaca: “Caballopi cac soldadocunaca ishcai pasac junumi can” nictami uyarcani.

17Muscuipi ñucaca caballocunatapish, shinallatac chaipi tiyacuccunatapish ricurcanimi. Chaicunaca safiro shina azul, shinallatac azufre shina quillu nina shina jagan nicuc fierrohuan pechota jarcarishcami carcacuna. Caballocunapac umaca leonpac uma shinami carca. Caballocunapac shimimantaca ninapish, cushnipish, azufrepish llucshicurcami.

18Paicunapac shimimanta llucshishca ninahuan, cushnihuan, azufrehuan, chai quimsa jatun llaquicunahuanmi, cai pachapi causac gentecunata quimsapi chaupishcamanta shuc partetami huañuchirca.

19Gentecunata llaquichingapacca, shimipi shinallatac chupapimi caballocunaca charirca. Chai animalcunapac chupacunaca culebra shina umayucmi carca. Chaicunahuanmi gentecunataca yallita llaquichirca.

20Shina llaquichicucpipish caishuc gentecunaca mana huañurcachu. Shina mana huañushpapish paicuna mana allita ruhuacushcataca mana saquircacunachu. Chashna cashpami supaicunatapish, curimanta, cullquimanta, rumimanta, broncemanta, caspimanta ruhuashcalla dioscunatapish adorashpa c'atirca. Chaicunaca uyanatapish mana uyanchu, ricunatapish mana ricunchu, shinallatac purinatapish mana purinchu.

21Shinallatac huañuchinatapish, brujianatapish, huacllirinatapish, shuhuanatapish mana saquircacunachu.