APOCALIPSIS 10 - Nuevo Testamento en Quichua Cañar 1996

Shuc uchilla pillushca p'angata ángel charicushcamanta

1Chai q'uipaca imatapish ruhuaclla ángel jahua pachamanta p'uyupi pillurishpa shamucuctami ricurcani. Paica umapica cuichi apashca, ñahuica inti shina jagan nicuc, shinallatac changacunaca nina culun nishpa rupacuc shinami carca.

2Paica shuc uchilla pillushca p'anga pascashcatami maquipi charicurca. Alli chaquihuanca mama cucha yacupi, lluqui chaquihuanca allpapimi sarushpa shayacurca.

3Shina shayacushpaca, león huacac shinami sinchita caparishpa rimarca. Shina caparicpica, canchis tulun nishcapish uyarircami. Shina canchis tulun niccunapac rimashcata uyashpaca, ñucaca quillcagrircanimi.

4Shina quillcagricucpi jahua pachamantaca:

—Chai canchis tulun nishpa rimashcataca ama quillcashpa, shungupi huacaichilla— nishcatami uyarcani.

5Chai q'uipaca mama cucha yacupi, shinallatac allpapi sarushpa shayacuc angelca alli maquita jahuaman churarcami.

6Shina churashpaca:

—Jahua pachatapish, cai pachatapish, mama cuchatapish, shinallatac tucui chaipi ima tiyaccunatapish ruhuacpac, huiñaita causacpac shutipimi cashna nini: Cunanca shuyana punzhacunaca ña mana tiyangachu.

7Ashtahuanpish canchis niqui ángel trompetapi tocacpica, Taita Diosmanta ñaupa huillac, paipacta ruhuaccunaman huillashca shinami, pai imata ruhuasha nishcataca pactachinga— nirca.

8Chai q'uipaca jahua pachamanta chai rimashcallatatac cutin uyarishpaca:

—Ri, chai yacupi, allpapi sarushpa shayacuc angelpac maquipi cac uchilla quillcashca p'anga pascashcata japigri— nirca.

9Shina nicpi rishpa, uchilla quillcashca p'angata mañagricpi angelca:

—Japi, micui. Cambac shimipica bunga mishqui shina mishquimi canga. Ashtahuanpish cambac huicsapica jayac tucungami— nirca.

10Shina nicpi angelpac maquimanta uchilla quillcashca p'angata japishpaca, micurcanimi. Shina micucpica, ñuca shimipica bunga mishqui shina mishquimi carca. Ashtahuanpish micushca q'uipaca, ñuca huicsapica jayacmi tucurca.

11Chaita micushca q'uipaca:

—Tauca pueblocunapish, llactacunapish, shuctac shuctac rimaita rimaccunapish, shinallatac jatun mandaccunapish ima tucuna cashcata cutin huillanami cangui— nircacunami.