HEBREOS 12 - Nuevo Testamento en Quichua Cañar 1996

Llaquita apashpa ashtahuan sinchiyanamanta

1Shina cashcamanta ñucanchic muyundicpi Diosta alli crishcata ricuchiccuna p'uyu shina achcacuna tiyashcamantaca, ima jarcaccunatapish, pandachic juchacunatapish saquishpa, ñucanchic chayana cashcamanca mana shaicushpa rishunchiclla.

2Jesusta ricuc shina c'atishunchic. Paimantami crinapish tiyan. Shinallatac paillatacmi alli cric cachun pushan. Paica llaquita apashca q'uipa, mai cushicuita japina cashcata yachashpami, cruzpi pingaichishca huañunatapish mana manchashpa huañurcalla. Chai q'uipaca Diospac alli maquimanmi tiyaringapac rirca.

3Chashna cashcamanta Jesusta juchayuc gentecuna yallita llaquichishcata yuyarichic. Chaita yuyarishpaca, ña mana c'atishun nishpa ama shaicuichicchu.

4Cancunaca juchata mana ruhuangapacca, macanacuc shinami sinchita shayarishcanguichic. Shina cashpapish yahuarta jichashpa huañungacamanca, mana llaquita apashcanguichicchu.

5Quiquin huahuata shina, Taita Dios cunacushcataca ñamari cungarishcanguichic. Dios quillcachishcapica:

“¡Ñuca huahualla!

Ima mana allita ruhuashcamanta

Taita Dios ima shinapish llaquichicpica,

ama ‘mana uyasha’ nichu,

shinallatac ña ama ‘mana c'atisha’ nichu.

6Taita Diosca c'uyashpami,

maijanta cashpapish llaquichin.

Shinallatac paipac huahuacuna cachun,

pai chasquishcacunataca

tucuitami llaquichin” ninmi.

7Llaquita apacushpaca, Diospac huahuacuna cashcamantami causanapac allipacllatac pai llaquichishcata chasquicunguichic. ¿Pi huahuatac pai mana allita ruhuashcamantaca mana llaquichishca canga?

8Taita Diosca tucui paipac huahuacunata llaquichic shinallatac, cancunata mana llaquichishpa chashnalla saquicpica, mana paipac quiquin huahuacuna shinachu canguichic.

9Ñucanchic taitacunaca ñucanchic uchilla huahuacuna cashpa, ima mana allita ruhuacpica, llaquichiccunami carca. Chashna llaquichicpica, cazuccunami carcanchic. Shina cacpica ñucanchic causaita japingapacca, ¿ima nishpatac jahua pachapi causac ñucanchic Taita Diostaca mana cazushunyari?

10Cai pachapi ñucanchic taitacunaca ashacamanllami quiquinpac allipacllatac ñucanchictaca llaquichiccuna carca. Ashtahuanpish Taita Dioscarin pai shina jucha illac cachunmi, ñucanchicpac allipacllatac ima shinapish llaquichin.

11Pipish llaquichicpi chai llaquichishcaca mana cushichinchu, ashtahuanpish nanachinmi. Shina cacpipish chai llaquicunata apanata ña yachacushpaca, cashcata ruhuashpa, sumacta causanatami yachachin.

Dios rimashcata mana cazusha niccuna llaqui tucuna cashcamanta

12Shina cacpica cancunapac shaicushca rigracunatapish, mucucunatapish cuyuchic shina sinchiyaichic.

13Shinallatac cancunapac huishtu chaquicuna alliyashpa, ama ashtahuan huishtuyachunca, ñanta allichic shina allita causaichic.

14Diospaclla mana causashpaca, pipish Apunchic Jesustaca mana ricungachu. Chaimanta Diospaclla causashpa, tucui mashnahuan apanacushpa, alli causanata munaichic.

15Maijanpish jayac sapi yura shina gentecunata muspachishpa llaquichic ama cangapacca, c'uyac Diosmanta ama caruyachunmi munanchic.

16Pacta cancunapuramanta maijancunaca huaclliriccuna cashpa, Diospaclla canata mana munanguichicman. Chashna ruhuashpami, Esauca punta churi japina cashcataca plato micunallamanta c'aturca.

17Chaita ruhuashca q'uipaca, paipac taitaman Esaú yallita huacashpa, bendicionta mañacpipish ña mana curcachu. Chashna mana cucpi, imata mana ruhuai pudishcataca cancunallatac yachanguichicmi.

18Cancunaca israelcuna*f** shina, tuparinalla urcumanca mana chayarircanguichicchu. Chai urcupica rupacuc ninapish, manchanayai amsapish, huaira huajiacucpish tiyarcami.

19Shinallatac trompeta tocashcatapish, Dios rimashcatapish mana uyarcanguichicchu. Chaita uyaccunaca ama ashtahuan rimarishpa c'atichunmi mañarcacuna.

20Chai urcupi Taita Diosca: “Maijanpish urcupi saructaca, animal cacpipish rumihuan, mana cashpaca lanzahuan shitashpa huañuchinami” nishpa, mandashcata mana uyashun nishcamantami, chashnaca nircacuna.

21Paicuna ricucushcaca yallimana manchana cacpimi, Moisespish: “Manchaihuan chucchucunimi” nirca.

22Ashtahuanpish cancunaca Sión*f** urcuman, causac Diospac jahua pacha Jerusalén puebloman, chaipi huaranga angelcuna tandanacushpa, Taita Diosta alli nicucmanmi chayarcanguichic.

23Jahua pacha libropi quillcashca, Diospac punta huahuacuna tandanacushcaman, tucuita taripashpa ricuchic Diospacman, shinallatac cashcata ruhuaccunata Dios allita ruhuashca almacunapacmanmi chayarcanguichic.

24Mushuc ari ninacuita pactachic Jesuspacman, shinallatac pai ñucanchicmanta jichashca yahuarmanmi chayarcanguichic. Chai yahuarmi Abelpac yahuarta atishpa, Dios ruhuasha nishcata ashtahuan allita ricuchin.

25Chaimanta Dios cancunata rimacta mana uyashun ninamantaca cuidaringuichic. Cai pachapi Dios ima nishcata mana cazuccunaca, tucuimi llaqui tucurca. Ñucanchiccarin jahua pachamanta rimacucta mana cazushpaca, ¿ima shinatac llaquimantaca anchurishunyari?

26Ñaupa punzhacunapica, Dios rimashca shimica cai pachataca chucchuchishcami. Ashtahuanpish cunancarin cutin chucchuchishpaca: “Mana cai pachallatachu chucchuchisha, jahua pachatapish chucchuchishami” ninmi.

27“Cutinllatac chucchuchishami” nishpaca, Dios ruhuashcacunamanta cuyuchinacunallata anchuchishpa, mana cuyurinacunaca saquirina cashcatami nisha nin.

28Dios cushca maipi mandacucca, mana cuyuchipacchu. Chaimanta manchaihuan, pai munashca shina tucui shunguhuan pagui nishpa, alli nishunchic. Paica chaitami munan.

29Ñucanchic Taita Diosca nina llama tucuita rupachic shinami.